Jehoshafat le Zumtu Nun

ZARHTENI CAANHMANNAK (Avoihnihnak)

Saturday, September 22, 2012

Visit VFC at www.vawngtuforchrist.blogspot.in

Caantlaitu      :           Pastor. Thomas Bawi Kil Lian (Geneva, Switzerland)

Phunchimtu   :           Rev. Siang Lian (Chennai, India)

Pathian a biathiang relnak he kan caan thawk hna uh sih

“Jesuh cu bia achim lio ah khan minu pakhat cu arak au i, “nangmah an hringtu le an zohkehnhtu cu mi thluachuak ava si dah” tiah ati. Jesuh nih aleh i, “na chimmi hi ahman, sihmansehlaw Pathian bia kha athei i angaimi cu zeitluk thluachuah dah a va si chin chin hnga!”(Lk.11:27, 28 CEV)

Thla kan cam hna lai: Vawngtu tefa hna kan cungah adawtnak le zawnruahnak he akhat i thluachuahza he lamtha akan hruaitu kan Biakmi kan Pathian na sinah kan i lawm i na min kan in thangthat ko! Maw Bawipa, hlaphuahtu nih lawmhnak bia cun chimlo adang leiba dang ka ngeiti lo tiah ati bangin na sinah lawmhnak bia chim lo in cun kan caah hin biadang chimding kan ngei lo. Ka Pa tu caanah hin athiangmi na bia cu na fapa Rev. Siang Lian hmangin hrawmti ding kan si cang hna, Bawipa pumpak pakhat cio kan nunnak ah athar in bia rak chimthan law Vawngtu tefa khuaza um kan caah thluachuahnak kan pekpiak hram ko tiah kan Bawipa Jesuh Khrih min in  thla kan cam kan Pathian. Amen.

Thawngtha Chimtu Tuanbiatawi: Tuzing thawngtha akan chimtu ding hi Rev. Siang Lian asi i amah hi Chin Association of Baptist Churches timi ah kum 6 chung Pathian rian atuan cangmi asi. 2005 Kum ah B.Th degree cu Myanmar For Christ Bible College and Mission, Kalaymyo ah alak i atu hi Indian Theological Seminary, Chennai, India ah M.Div II nak, (a kumhnihnak), akai lio asi. Bawipa nih lamtha hruaichin ko seh! Vawngtu tefa hna kan caah hibantuk in thawngtha akan chimhkhawh cazong ah kan i lawmtuk tikha kan vanlanghter. Thawngtha chimtu sawm cang hna u sih.

                                Thawngtha Chimtu Tlangtar:  Jehoshafat le Zumtu Nun

Biahmaitti: A hmasa bik ah hibantuk in caantha a ka petu ka Pathian ka thangthat, cun Vawngtu for  Christ le tuanvo ngeitu nan cungah lawmhnak tampi ka ngei. Bawipa nih thluachuah inpe chin ko hnaseh. Cun tuzan/tuni ah Thawngtha a ngai tu nan dihlak cungah lunglawmhnak chim cawk lo ka ngei.

Phunchimtu Bible Relnak: “7A bawi kum thumnak ah a bawi Benhail, Obadiah, Zekhariah, Nethanel le Maikaiah kha Judah ram chung khua hna ah cawnpiaktu ah a thlah hna….9Cun Judah ram chungah khan Bawipa phungbia cauk kha an i put i an cawnpiak hna; Judah ram chung khua vielte kha an ttol i mi kha an cawnpiak hna…10Cun Judah ram pawngkam i a ummi ram vialte cungah khan Bawipa ttihnak kha a thlung i Jehoshafat kha an do lo.”(2Chanrelnak 17:7, 9-10).

Jehoshafat le Zumtu Nun

Judah miphun hi phun 12 an si i asinain Bawipa a lawm lo caah Solomon fapa Rehoboam chanah Judah le Isreal tiah phun hnih in an i then,Isreal cu phun 10 an si i, Judah cu phun 2 lawng an si,asinain Isreal siangpahrang cungah cun Bawipa a lawm lo. Judah siangpahrang cung tu ah cun Bawipa a lawm deuh, a ruang cu Judah nih Bawipa duhnak kha a tuah deuh, a kawl. Ca thiangah kan rel bantuk in Jehoshafat cu a bawi kum 3 nakah a ram chungah BAWIPA phungbia cauk kha cawnpiak dingah a thlah hna, siangpahrang a si cangka in a tuah hmasa cem mi cu ‘Thlarau lei in ka miphun an dam maw,’ ‘ka khua a dam maw’, ti kha a zoh, a kawl hmasa. Ka dawt mi ka u nau hna nangtah na inn chungkhar ah le na miphun, na khua ramah zeidah na kawl hmasa? Zei tlukhmanh in rum law zeitlukhman in kan khua caah pe law Bawipa na kawl lo ahcun na pek mi le na rumnak kha santlai lo a si ko lai, kan khua hi Bawipa bia ah rum hmasa u seh, kan inn chungkhar hi Bawipa bia ah DAM hmasa seh, Jehoshafat nih ka ram chungah SUI a um maw? Mi kan tam maw?  ti hi a zoh hmasa lo. Bawipa an kawl maw? A nawl an ngaih maw?, tihi a zoh, a kawl hmasa. Ka dawt mi ka nu le ka pa hna kan chungkhar, kan miphun, kan khua ramah hin Pathian bia hi vahpi in chim ko hna u sih, bia dang tampi vahpi nak cha cun, Pathian bia ah rum ko u sih, kan chungkhar,  kan khua hi zeitluk in thancho sehlaw Bawipa bia hnu kan chit ah cun kan ngei mi thil hi kan caah ngeihchiat nak lawngte an si ko lai.

Biadongnak (Biafunnak): Jehoshafat cu a ram chungah Bawipa phunbia a cawnpiak hna caah, a miphun nih Bawipa an tih i, cun a pawngkam ram hna zong nih Judah miphun cu an tih hna i an doh ngam hna lo, cu lawng cu a si lo ngunkhuai an rak pek, a tuah hmasa mi kha Bawipa kawl, zoh a si caah Bawipa a lawm i a bawmh. Kan nih zong Bawipa duhnak kan tuah hmasa ahcun Bawipa nih a kan bawmh lai i kan ram, kan miphun, kan chungkhar a DAM ter ko lai, chungkhar in thla nan cam bal maw? Chungkhar pumhnak teh nan tuah bal maw? Judah ram nih Bawipa an ttihnak aruang cu an siangpahrang nih Bawipa an tih hmasa caah a si, chungkhar ah nu le pa kan biapi tuk, hruaitu kan biapi tuk hi mu, nu le pa kan dam ah cun kan fanu fapa hna zong an dam dih ko lai, hruaitu kan dam ahcun MEMBER zong an dam dih ko lai.

Hi vial in ka bia ka donghter lai, a thei a ngaitu nan dih lak cungah Bawipa nih thluachuah inpe chin ko hnaseh, ka lawm.

Donghnak Thlacam: Bawipa hibantuk in thawngtha i hrawmkhawhnak ding caah caantha kan hmuh cu kan i lawmtuk hringhran. Hi thawngtha hi areltu kan dihlak caah kan nun lamhruaitu dingah thlua kan chuahpiak hram ko tiah kan Bawi Jesush min thla kan cam kan Pathian. Amen.