Thahnem Duhruangah Zatlaknak

Saturday Caanhmannak (Sept 15, 2012)

(Avoikhatnak Vawngtu for Christ Caanhmannak)

Caantlaitu                    :              Salai Tial Hnin (Yangon, Myanmar)

Phung Chimtu            :              Salai Ni Bik Thang (Hyderabad, India)

Ahmasabik ah hi bantuk caantha caansunglawi a kan petu kan Pathian a minthiang thangthat si ko seh, Vawngtu for Christ (VFC) chungtel dihlak kan umnak hmuhma cio ah Bawipa nih kan um pi cio sehlaw hmailei ah khua le ram caah thlachuah phortu fanu fapa kan si khawh nak hnga bawipa nih a van fimhnak le thlachuahnak kan pe hram ko seh.
Thawngtha a kan chimtu Salai Ni Bik Thang cungah lawmnak tampi kan ngei. Anih hi India, Mennonite Brethren Centenary Bible College, ah B.Th final year a kai lio mi a si. Ariantampilak ah Thawngtha zong a kan chim khawh caah a cungah lawm a um tuk hringhran. Salai Ni Bik Thang zong, na cungah Pathian thlachuahnak le a thlarau in telpinak um zungzal hram ko seh.

Hramthawknak Thlacam

Bawipa nifathin kan tlawnlengnak ah na kan zoh khen, na kan kil vel i tuni then tezongah nangmah thangthat khaawh nak caantha nan kan pek caah na cungah lunglawm nak tampi ka ngei atu kan can hmannak chungah satan riantuannak tel lo in deinak he adongtiang na thiangthlarau in kan tel than hram ko, kan caan vialte na kut cung chanhbu in khamhtu Zisuh min in thla kan cam kan Pathian. Amen.

Phunchimtu Tlangtar: “Thathnem Duhruangah Zatlaknak”

 “Cun zultu pahleihnih lak i pakhat, Judas Iskariot timi kha, tlangbawi upa pawl sinah khan a va kal i, ‘Jesus cu nan kut chung i kan chanh hna ahcun zeidah nan ka pek lai?’ tiah a vat i hna. Cu caah ngun tangka sawmthum kha an rel i an pek. Cu ri cun Judas nih khan Jesuh rawinak ding caan rem kha a bawh.” Mathew 26:14-16.

Biahmaitti: Vawngtu for Christ group ah a voikhatnak theng teah thawngtha chimnak caantha nan ka pe caah nan cungah lawmnak chim cawk lo ka ngei.

Prophet Isaiah nih fapa a chuak lai, amah cu fimchimtu a thawngmi pathian a ti (Isaiah 9:6). Arfi zohthiam hna zong nih Judah siangpahrang si ding mi hmuh an duh ( Mtt.2:2). Cun zultu hleihnih nih khan an I ruahchih mi cu  Jesuh nih a zeipaoh a kan tuahpiak dih lai tiah an ruah caah an zul ngam. Sihmansehlaw, Jusuh cu an tleih tik ah a zultu pawl nih an zamtak dih (mark 14:50). Zultu lak I aa tel ve mi Judah nih Jesuh cu Siangpahrang a site lai tiah aa ruahchan peng an ti.Judah nih ruah nak pakhat a chuah mi cu Jesuh hi Rome ralkap sin ah ka ap lai I  a vancung ralkap pawl nih Jesuh cu an zohkho lailo i, Rome ralkap pawl cu an van tuk hna lai i, Rome pennak cu Jesuh pennak ah a cang lai” tiah a ruah an ti. Judah nih Jesuh cu  fawi tein siangpahrang siter a duh.

Thathnem duh ruangah thil fawi tein tuahnak nih cun:

(1).Mi a leem: Bible ah Judah cu Jesuh tangkaa kengtu a si(John 13:29), I a fir pah tawn an ti. A lem rua.  Jesuh kha taangkaa 30 in a zuar (Mtt.26:15).“Judah nih Jesuh a zuar nak kong  pakhat an puhmi cu fawi tein tuah khawh a duh caah a si ”, William Barclay  nih a chim.

(i) Cun Lybia pawl cu “an zinan ( oil) nih an tha a thutter hna” an ti. Riantuan hau loin zinaan in an rum. Har nak an ton ah an celh lo. Cu ve bantuk in kan khua zong a kan leem ve rua ram dang lei kan u nau le far kan I rih hna I rian ttuan kan huam ti lo. Ttuan lo cun kan hmu lai ti I ruahchin ding kan si lo. “Naaman kha Jordan tiva ah voi 7 aa hnim I a dam(2siangpahrang 5:14). a tuah caah dam nak a hmuh.

 (ii)Laa-aw lei lam khi lamphawk (phiat lam)ah kan can ter dih, mah nih khin thil fawi tein hmuh duh nak a langhter ngai. Laa-aw lei cun a nai deuh i re a theih deuh, Lungsamat lam lei cun a hla deuh i tha a dam deuh ve.

(iii) Atu ah laimi tampi nih kum sau deuh sianginn kai kan huam lo, a kai cia mi hmanh a sau kan ti ruangah a ngawl tthan mi an tam, rang tuk in degree lak kan duh caah kan thiam nak nih a tlinh lo I thangchiat nak le lungretheih nak a chuahpi tawn.

(2).Sau a nguh lo: Laimi tampi cu kum 40 ah an tha a tum ngai.phiat lam (direct) kan kal nak ah upat lei ah an thahri a dor rua. Mirang cu kum 40 ah an thawn saling te a si an ti. An tar a har. Laimi cu sau kan rum kho lo, sau kan thawng kholo, sau kan i dawh manhlo, sau kan tthang manhlo, kan ziamh a tuan,kan thih tuan. Fawi tein hmuh mi cu sau a nguhlo.

(3).Sunghnak, thihnak a si: Bible ah Ahab nih fawi tein Nabot dum a chuh.Sihmenhsehlaw sau a nguhlo (1siangpahrang 21:2,24).Sadam Hussein nih fawi tein cozah sinak a lak i a ngei mi vialte hmang manhlo in hri in an thlai. Absalom nih fawi tein siangpahrang si aa tim i, a pa David cu a doh. Siangpahrang si manhlo in a thi (2 Samuel 18:15).

Biafunnak: Hi thawngttha nih a chim duhbik mi cu fawi tein thil hmuh duh cu a tluang lo i lungretheihnak a kan petu a si lehlam. Jesuh cu Pathian khuakhan ning tein a kal cuahmah ko. Sihmansehlaw, Judas Iskariot nih rangtuk in siangpahrang siter a duh. Cu caah Judas Iskariot cu a nunnak tiang asungphahnak a si. Cu caah hoi dawt vialte phiat lam cu a si khawh chungin hrial khawh i zuam ko hna usih. Zeithil kan tuah poah tikah, ruah hmasanak, thinfualnak le lungsaunak he tuah zungzal i zuam cio hna u sih.

Pathian supernak caah sihram ko seh. Amen.

Donghnak Thlacam

Bawipa kan caan ahramthawk in adongtiang deihnak le lawmnak he na kan um pi caah na min thiang cu a zungzal in thangthat si ko seh. Nihin kan caanhmannak ah na thawngtha kan thei mi hi nitin kan nunnak ah nangmah lei kar kan hlannak ah thazang a kan petu asi khawhnak hnga thlua kan chuak piak ko, kan caan ka donghter cang lai, na fa le lungrualnak kan pe, cutincun na fapa min in lungrualnak kan pe hram ko: kan caan atangrihmi le kan nunnak vialte na kut cungah chanh buin na fapa Zisuh Khrih min in lunglawmnak he thla kan cam kan Pa le kan Pathian. Amen.

"Thawngtha" ah Kal
"Innpi" ah Kal