Ceunak

ZARHTENI CAANHMANNAK

Saturday, November 10, 2012

Visit VFC at www.vawngtuforchrist.blogspot.in

Caantlaitu                :           Salai Ni Bik Thang (Hyderabad, India)

Thawngṭha Chimtu:           Salai Van Biak Hnin (Hyderabad, India)

A tu caan tian lam a kan hruai i a kan um pitu kan Pathian a min thangṭhat si ko seh. Bible carelnak le thlacamnak in kan can kan thok hna lai.

Psalm 148: 11-12, “¹¹Siangpahrang vialte le mi vialte hna, uktu le bawi vialte hna, amah cu thangṭhat u! ¹²Tlangval le ngaknu hna, tar le no le ngakchia vialte hna, a mah cu thangṭhat  u!.”

Hramthok thlacam : Maw Bawipa nifatin kan tlawnlennak le kan rian cio ah hlawhtlinnak na kan pek i lam  na kan hruai zungzal, thongpang ṭha na kan theihter caah na min Thangṭhat si ko seh. Maw Bawipa, Thawngṭha chimtu hmurka le a thinlung dihlak nangmah nih hmang law, na salpa nih a phuanmi na Bia hi kan dihlak caah lam hmuhsaktu a si khawh nakhnga thluachuahnak kan pekpiak hram ko tiah na sinah zangfah hal in thla kan cam kan Pathian.

Thawngṭha Chimtu Tuanbia Tawi

Thawngṭha a kan chimtu (aerosmithhnin@gmail.com) cu Chin Christian College in B.A (English) a kan dih piak i a tu hi Mennonite Brethren Centenary Bible College, Hyderabad, India ah B.D a kum (4) nak a kai lio a si. A nih cu Saya Ceu Mang le Pi. Ni Ṭhai i an fa apalinak a si.

THAWNGṬHA CHIMNAK

Tlangtar: CEUNAK

By: Salai Van Biak Hnin

Bible: Matthai 5:14-16

"¹⁴Nan nih cu vawlei ceunak nan si. Tlang cungah an tlakmi khua cu zeihmanh nih a phen kho lo. ¹⁵Ahohmanh nih meifar an van tikah kho an khuh bal lo, mei vannak tu ah khan an chiah tawn i inn chung I a ummi vialte kha a ceuh dih hna. ¹⁶Cu bantukin nan nih nan ceunak zong cu mi hmaiah a ceu awk a si, cuticun thil ṭha nan tuahmi kha an hmuh lai i vancung khua i a ummi nan Pa kha an thangṭhat lai."

Baihmaiṭhi

Hi bantukin thawngṭha thlahnak caan ṭha ka hmuh caah a hmasa bikah Pathian min ka thangṭhat. Cun "Dopawngvawntu Forum" ah thawngṭha bia, thazaang i peknak in caan a ka petu "Vawngtu for Christ Forum" i rianṭuan tu an cungah lawmnhnak tampi ka ngei. Hi Mathai thawngṭha "Cite le Ceunak" timi ah hin "Ceunak" tu hi hmuitinh deuh in i ruah ṭi hna usih tiah kan sawm hna. Thawngṭha ah kan lut colh hna usih.

Mathai Ṭial Caan le Sining

Mathai cu Jesuh zultu hleihnih lak ah pakhat a si ve i a nih hi Jesuh Khrih a zulh hlan ah  ngunkhuai khawltu a rak si. Jesuh nih aa manh lo lio, cazin a tuah cuahmah liopi ah a auh mi a si. Cun Levi tiah zong auh a si. Hi thawngṭha a ṭialnak hmun cu Antioh khua ah a si tiah Bible thiamsang(scholars) tambik nih zumh a si. Cun hi ṭial caan hi C E 80 hrawng a si lai tiah tambik nih zumh a si.

Nan nih cu vulei ceunak nan si

Biakam hlun chan ahhin Judah mi nih Israel le Jerusalem hi vawlei ceunak tiah an rak ruah. Bible ah ceunak timi hi tahchunhnak pipa ngai ah a hman tawn. A si nain Thawngṭha a palinak Johan nih Jesuh cu vawlei ceunak tiah a langhter. Jesuh zultu hna kha hmasabik ah cite le ceunak tiah an rak ruah hna. Hi zultu hna nih hin Pathian pennak cu mi vialte sinah an rak phuan. Cucu zultu taktak an rak sinak kha a si i mah nihkhan hawi le kom siseh, ral/do tu hna siseh ngeihthiam khawhnak kha thiangthlarau nih a rak pek hna. Vawlei ceunak tiah rak ruahmi Jerusalem le Israel cu Pathian thimmi miphun le ram a si ca le siangpahrang mi lianngan hna umnak a rak si caah khan a si. A si nain Jesuh nih hi Jerusalem ceunak bantuk in ceu dingah a kan fial lo. Amah Jesuh Khrih zumhnak thawngin vawlei ceuter ding tu kha a rak kan fial. Cu ceunak cu Isaiah 9:2 chung i "Muilak i a rak i chawkmi hna nihkhan ceunak nganpi an hmuh cang! thihnak thladem tangah an rak um sihmenhsehlaw a tu cu ceunak nih a ceuh cang hna." tiah a ti.

Zultu sinak in ceunak ah

Hi kaa zawn i Mathai nih ceunak tiah a timi hi Jesuh nih a thimmi zultu kha a chimduh mi a si deuh. Nain Jesuh Khrih nih nan nih cu hi vawlei ceunak nan si a timi tu cu vancungpennak a cohlang mi le a mah Jesuh a zum hnga dingmi kha an si. Jesuh Khrih zumhnak thawngin midang ca ceu ve dingah fialmi kan si. Cu ceunak cu biakinn chung lawngah a langh awk a si lo, Jesuh nih, nannih cu biakinn ceunak nan si a tilo, Vawlei ceunak nan si tiah a ti. Cu ceunak cu kan chungkhar siseh kan hawi le sin siseh mikip sinah a si awk a si.

Ceunak Hmu/co dingin auh kan si

Ceunak hmu dingin auh kan si i cu kan ceunak cun midang cerhchin ve dingah Jesuh nih a kan fial. John 1:12 chungah ".Asinain tlawmpal nih cun an rak cohlan i an rak zumh i cu hna cu Pathian fa cannak nawl kha a pek hna". Jesuh Khrih kan co hnu cun ceunak chungah a tlongleng ding kan si . Mithiang Paul nih Efesa 5:8 chungah, "nannih hrimhrim zongkha muihnak chungah khua nan rak sa, sihmenhsehlaw Bawipa mi nan si cang caah ceunak chungah nan um, cucaah ceunak mi a si mi bantuk in nan um awk asi". Muihnak chung kan tlonlen lio ahcun harsatnak le lungretheihnak phunkip kan tong Jesuh Khrih a ceunak le a ṭhatnak kan pemh kho lo. Kan tuahmi sualnak le ṭhatlonak ruangah Jesuh sinin kan i thup peng, cu muihnak chung kan i thuhnak nih Jesuh Khrih a ṭhatnak le a thlachuah vialte a kan tlorh/sunghter dih. Jesuh Khrih sinin thuhmi kan ngeih lo hnu, a ceunak chung kan um hnu lawnglawng ah deihnak le hnangamnak tling kan ngei lai. Deihnak, hnangamnak, fimnak vialte Jesuh sinah a um dih ralbawi tampi nih deihnak hi meithal ah a um rua tiah an ruah lengmang. Cu ve bantuk in fimnak zong Bible sianginn le University zongah a um hlei lo, Jesuh sinah a um dih. Cucaah cun David kha tukhal te a si ko nain Bawipa nih a cawisan i, Jerusalem i fimnak a cawngmi vialte cu an rak rawkral/ti liam in an rak liam dih.

Bia Donghnak

Kawlram phungki pa Khrihfa i ai thleng mi pa nih a chimmi cu minung hi Jesuh ceunak chung i kan um hlan cu kan mah le kan thlapahle/muihnak kha a dawimi kan si ko, nain Jesuh khrih lei kan i mer hnu ahcun kan thlapahle tu nih a kan dawi, kan neih deuhdeuh a tawi thluahmah Jesuh khrih a ceunak kehram kan phak hnucun kan thlapahle kha kan ke in kan lamh/kan teidih cang. Cucaah cun dawtmi U le Nau hna muihnak chung i a um rih mi nih Jesuh khrih ceunak kehram ah ra in midang cazongah kan ceunak hmang ve cang uhsih.

Thawngṭha ai hrawmmi kan dihlak caah Bawipa nih thluachuahnak kan pekpiak ko seh.

Dongnak thlacam : Maw bawipa caan tlamtling tein na kan hmanter caah na min thangṭhat si ko seh. Haleluah, hi na thawngṭha hi a chimtu le a reltu vialte kan cungah na zaangfahnak tlunghram sehlaw thinlung tak in kan nun pi i kan zulh khawhnak hnga na thiang thlarau in rak kan bawmh hram ko tiah na sinah lunglawmnak he thla kan cam kan Pathian. Amen.

-------------------------------------------&---------------------------------------------