Mi Chambau Kan Si ti Aa Hngalhmi cu Lunglawmhmi Nan a si dah...

ZARHTENI CAANHMANNAK

Saturday, November 17, 2012

Visit VFC at www.vawngtuforchrist.blogspot.in

Caantlaitu                   :           Salai Van Biak Hu (Shilong, India)

Thawngṭha Chimtu     :           Pastor. Lal Khar Lian (Kalay Myo, Myanmar)

Bible Relnak: “³³Ka nun chung vialte Bawipa cu hla in ka thangṭhat lai; ka nunnak a um chung ka Pathian thangṭhatnak hla cu ka sa lai. ³⁴Pathian nih lunglawmhnak a ka pek zat in, ka thangṭhatnak hla nih amah cu a lunglawmhter ve seh.”(Salm 104:33-34)

Hramthawk Thlacamnak: Adawtnak chungah humhimnak he lam a kan hruaitu kan Pathian, na min sunglawi cu thangṭhat si ko seh. Na fa le na dawtnak le na ṭhatnak ruangah tuni zongah na thawngṭha ihrawmṭinak caanṭha le caansungluai na kan pek ṭhan caah na minthiang cu thangṭhat si ko seh. Kan Pathian, nangmah nih kan thinlung le kan ruahnak ah rian rak ṭuan rih law hi an thawngṭha in lamṭha kan hmuhsak hram ko tiah kan Bawipa le a kan khamhtu Jesuh Krih min in thla kan cam, kan Pathian. Amen

Thawngṭha Chimtu Tuanbia Tawi: Pastor Lal Khar Lian cu 2005 ah Apostolic Bible College, Yangon in B.Th degree kan dihpiak i atu hi Kalay UPC Church ah Church Pastor aṭuan lio a si.

THAWNGṬHA CHIMNAK

Thawngṭha chimtu: Pastor Lal Khar Lian

Kan Bawipa Jesuh min in nan kut kan tleih hna, kan Pathian sin in a ra mi hnangam deihnak cu nan cungah um hram seh. Hi bantuk in caan a ka petu riantuantu nan cungah lunglawmhnak chim cawk lo ka ngei pinah chimrel kho dingin damnak le caanṭha a ka petu ka Pathian min zong ka thangṭhat,

Bible Cang: ³"Mi chambau kan si ti aa hngalmi cu, lunglawmmi nan va si dah! Van cung pennak cu nanmah ta a si.” (Matthai 5: 3)

Hi Bible cacang hi India ram luatnak alatu Gandhi nih a duh ngeimi a si, Jesuh nih mi zapi kha tlang cungah cawnpiaknak a ngeih hna tikah a pakhatnak ah a chim mi bia a si, a velchum i a um mi mizapi hna le a zultu hna kha a thawh hna i hitihin a ti hna,"micham bau kan si ti aa hngal mi cu lunglawmmi nan va si dah," a chim duhmi cu vawlei cung minung a tlingmi lakah atlinglomi nih nan tlinglonak or nan chambaunak nan i hngal ahcun a ti duhnak a si lo, nan dihlak in mi chambau nan si a ti duhnak tu a si.

Vawlei cung kan sining kong kan zoh asi ahcun atlingmi zeihmanh a um lo i mi zeihmanh zawng kan tling fawn lo, vawlei cung i minthang kan ti mi Mifim hna hi an fimnak atling kho lo, cun Mirum zong an rumnak atling kho lo, cun Mithiam zawng an tling kho lo Muidawh lebang cu sawi awk seikhat an ti, ka chim duhmi cu a tlinglomi vawlei ahhin a hohmanh kan tling kho lo.

Vawi khat cu ka tling-ngei tiah a ruahmi pa nih a tlingmi buu a kawl ti a si , buu khat a va phan i an nih cu an thi an si a ti i a kir ṭhan, cun buu khat ah aa ṭhial ṭhan i an nih cu an nun athianglo tuk a ti i a kir ṭhan, buu khat ah a ṭhial ṭhan i an nih cu mi kong ceih an hmang tuk a ti i a kir ṭhan hawi, mahticun buu khat hnu buu khat aa ṭhial lengmang i adonghnak bik ah a tlingmi buu a va phan tik ah atlingmi buu nih cun nangmah cu na tlinglo i kan buu chungah na um kho lo an ti i a kir ṭhan ti a si.

Vawlei cungah ka tling tiah a ruah mi hna zawng Pathian hmai an phan tik ahcun an tling kho lo, Jhon 8 :1-11 tiang kan zoh a si ahcun a sual lio i an tleih mi nu kong kan hmuh, Judah phung ahcun sual lio tleih mi hna cu lung in thi lak in cheh ding a si , phungbia cawnpiaktu saya hna le farasi mi nih mi nu pakhat a sual lio ah an tleih, hi a tlaitu hna hi mi nung ruahning le hmuhning ahcun mi ding mi fel ka thiang aa ti mi pawl an si, mi nu cu Jesuh sin an phan pi tikah ruahnak an hal, a hme 4-5 kan rel a si ahcun Jesuh nih ding tein a hawng ṭhu i nan lak i sualnak a tuah bal lo mi nih chep hmasabik seh tiah a ti, cu bia an theih tikah an dihlak in an i zuk i lo diam an kal dih timi kan hmuh, a ngai ngai kan ti ahcun ka tling rua tiah aa ruahmi hna nih a tlingmi Jesuh sin an phan tikah cun an tling kho hrim lo, a sual lio i an tleih mi nu he Jesuh hmai ahcun an i tluk ko.

Cu caah a tlinglomi minung nih a tlingmi vancung pennak chungah kan luh khawhnak ding ahcun mitling lo ka si ti i hngalh hi a si ko , mi chambau ka si ti aa hngal mi nih cun;

1. Mi chambau ka si ti aa hngalmi nihcun a daithlang bal lo zeicatiah a tlu kho, a thi kho, a chuah kho ti kha aa hngal peng

2. Mi dang nakin ka ṭha deuh timi lungput a ngei bal lo i mi dang sualnak zeitik hmanhah hmuh ai zuam lo

3. Mi tang aa dor i an nun zawng a nem fawn.

4. Bawmtu a herh peng bantuk in mi zawnruahnak he mi bawmh duhnak lungthin a ngei peng

Cu caah Jesuh nih a dam mi nihcun sii bawi an herh lo a zaw mi lawng nih an herh a ti cu,( matt 9 :12 ). Jesuh nih a cohlanmi nun cu zeidang vialte nakin mi chambau ka si ti hi a si . Luka 18 : 9 in 14 tiang kan rel a si ahcun ngun khuai khawltu pa le farasi pa thlacamnak kan hmuh , farasi pa nih cun hi tihin thla a cam ‘Pathian kei cu mi dang bantuk hak kau ka si lo, lih a chim mi nu le pa sualnak a tuah mi ka si lo caah kan lawmh,cun khi ngun khuai khawltu pa bantuk zong ka si lo caah kan lawmh fawn, zarh khat chungah vui hnih lengmang rawl ka ulh i cheuhra cheukhat kan pek’, tiah a cam, a si nain ngun khawi khawltu pa nih cun van le vawlei hmanh zoh ngam lo in a ṭang kha a cumh i , ‘Maw Pathian kei mi sual cungah hin zangfahnak ngei ko tiin a cam’, Pathian nih a cohlang mi cu farasi pa kha siloin ngun khawi khawltu pa kha a si ti kan hmuh.Cu caah cun Jesuh nih a kan co hlannak cu kan tuah sernak ah khan siloin kan sining, mi chambau kan sinak i hngalh nak ah khan a si.

Hi thawngṭha a reltu nan dihlak cungah Bawipa thlauchuah um hram seh, lunglawmhnak chim cawk lo ka ngei.

Donghnak Thlacam: A fa le adawtnak he lam akan hruaitu kan Pathian na minthiang kan in thangṭhat ko. Na dawtnak kha a ngan tuk hringhran caah na cungah kan i lawm ko kan Pathian. Nangmah nih nihin ah thawngṭha kan theihmi hi kan nunnak ah acam i lamṭha a kan hmuhsaktu ah siter hram ko sawh tiah khamhtu Jesuh min in thla kan cam kan Pathian. Amen.