Zumtu Nun le Cite

ZARHTENI CAANHMANNAK

Saturday, November 24, 2012

Visit VFC at www.vawngtuforchrist.blogspot.in

Caantlaitu                  :           Salai Ṭial Hnin            (Yangon)

Thawngṭha Chimtu    :           Pi. Dar Hlei                 (Yangon)

Bible Relnak:

“²⁸Rehtei le thilrit mi vialte hna, ka sinah ra tuah u, dinhnak kan pek hna lai. ²⁹Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. ³⁰Ka seihnam cu a bei a nuam i ka thil cu a zaang,”tiah a ti. Matt 11:28-30

Hramthawk thlacam: A kan dawtu kan Pathian, na fale kan umnak hmun poh ah damnak he lam na kan hruai caah na min kan in thangṭhat, hi kan caan hmannak chungah nangmah nih kan umpi law, na bia kan thei lai dingmi vialte na fale kan nunnak ah thlarau ṭhawnnak a kan petu le na sunparnak alangter khotu kan si khawh nakhnga, kan nunnak dihlak na sinah chanhbu in thla kan cam kan Pathian. Amen

Thawngṭha chim tu tuanbia tawi: Pi Dar Hlei hi Dagon Biblical University ah B.Th adih mi asi. Atu hi North Dagon,Yangon ah Ngakta a zohkhen mi asi…(Thawngṭha chimtu biatlangvan ah tamdeuh in relkhawh asi).

THAWNGṬHA CHIMNAK

Tlangtarmi: Zumtu Nun le Cite

Pi. Dar Hlei

Biatlangvan: A hmasa bikah Pathian min thangṭhat sikoseh.Cun tuzing caan a ka petu Vawngtu For Christ hruaitu upa nan dihlak cung  le khuami hna nan cungah lunglomhnak tampi ka ngei .Hi bantukin Vawngtu For Christ ahhin can nan ka pek lai tihi ka rak ruat bal lo.Pathian hmaizoh in can a ka petu Vawngtu For Christ  upa le khua mi hna nan umnak le nan riantuannak cungah Pathian nih thlachuah inpe ko hna seh.

Thawngṭha chimnak ah kan lut hlan ah keimah ka konglam  chim ta ka duhmi cu -  kei hi a ka thei mi zong nan um lai i a ka thei lo mi zong tampi nan um lai . Ka pa cu Za Re asi ka nu cu Dar Iang a si. Kan nih hi Unau parut chuak kan si i Upa bik cu Thawng Oke a si. kei hi u nau rual lakah a pathumnak ka si. Kan hngakchiat tein Thantlang khua ah kan um.

Pathian dawtnak le zangfahnak thawngin Thantlang khua i a um mi Saya No Mang ngaktah zohkhenhnak ah  khan rian ka rak ṭuan ve .Cuhnu cun 1999 kum Yangon Dagon Myo Thit  ( Saya Van Ram Ok sianginn Dagon  Biblical University ) ah B.Th ka rak kai . 2003 kum ah B.Th  third year  ka kai kum  ah Bawipa nih a rianthiang ṭuan dingin a ka auh i (  Precious Children Center (PCC) Mission  hi Yangon Dagon Myo Thit ah zumhnak in dirh a rak si. Kan fa letete zong hi Naga le Rakhine le Tuluk le Chin ramkip le hmunkip in a rami an si. Pathian zangfahnak le dawtnak thawngin  P.C.C mission rianṭuan pah buin B.Th final year cu ka peh. 2007 kum ah Pathian dawtnak thawngin B.Th cu ka dih. Pathian nih a kan zangfah i ( P.C.C ) mission rian kan ṭuannak ah  kan fa le tete zong micheu cu tanghra awng mi zong an um i University tiang a rak phan mi tete hna an rak um. Nihin ni tiang hi zumhnak tein kar kan hlannak ah Pathian nih thlachuah a kan pe. Hi hnu hmai lei (P.C.C )  kar kan hlannak zongah zumtu nu le pa hna kan ruanṭuannak ah thlacam kan bom cio uh  tiah  Kan Bawipa Jesus min in kan cah chih rih fon hna. Kan Bawipa tu nih Sunparnak co ko seh.

Thawngṭha Chimtu Bible Thimmi:

Mathai  5:13 , “Nannih cu vawlei cite nan si. Sihmanhsehlaw cite kha a alnak cu a loh ahcun, zeitindah alter khawh a si ṭhan ti lai? Santlaihnak kha a ngeih ti lo caah hlonh awk le lam hawk men a si ko cang.(Relchihding mi Bible cacang  Marka 9:50, Luka 14:34-35)

Tuchun biatlang tar ka duhmi cu “Zumtu nun le Cite” ti asi lai.

Zumtu Nun le Cite

Thlacam ta uh sih  -  Vancung khua i a um mi a nungmi kan Pathian ahmasa bikah na min thangṭhat sikoseh. Tuzing na bia a phuangtu na fanu Dar Hlei, Adam i ka minunghlun  vialte Vailam cung Cross ah tahchih , rialchih, thlakpiak dih ka  si cang nak kha,atu can zongah  na fanu Dar Hlei ka minung hlun cu ka thlakpiak ṭhan rih law, a thiangmi  thlarau in ka hmurka, ka  lei le dang ,ka nunnak vialte na thiang thlarau in thuam ṭhan law tuzing na fa le  na biathiang ai hrawmṭi ding a ra mi kan dihlak cungah na biatak cu rak i phuangṭhan ko tiah  na fapa Jesus Krih min in thla kan cam kan Pathian. Amen

Cite kong ka chim hlan ah , Nu le pa le u le nau hna nan sin ah bia hmaiṭhi chim ka duh mi cu - Cite hi zei in dah aisiam i , zei hmun in dah a chuah timi hi thlawm te van chim ta le van fianter ta ka duh. Cite ai siamnak hmun kan zoh a si ahcun Cirh ti putnak cirhti almi tiin a chuak i aithawk. Cu Cirhti almi cu zeitin dah kan theih khawh lai ti a si ahcun, cirhti almi cu Saram. Saṭil, Zu le Va zong nih an tlanh i an fuh ti kha kan hmuh i kan theih.

Cun  cirhti almi cu minung nih kan than, kan phurh i inn ah kan tlunpi cu hnu cun thing kan tih, Mei kan kau . U Kang kan khing i thlan hripi put in cuticun kan chumh. Cun cuti kan chumh mi cu a reu cik cek dih hnu ah Cite cu a chuak.

A pakhatnak ah: Cite cu mi vialte nih kan herh. Siagpahrang zong nih aherh , Mirum zong nih an herh,Sifah zong nih a herh, Mihrut zong nih kan herh . Cite a herh lomi chungkhar kan um lo. Mizei chungkhar poh nih Cite cu  herh dih kan si dih.

A pahnihnak:  Cite cu zeitik hmanh ah hlawrh a tong bal lo. Tahchunnak ah chim ka duhmi cu inn chungkhar ah Sa te hna cun An hringso te hna meh kan chumh tikah siseh, cun rawl kan ei i ,Sa kan i meh tik hna ah khan sa cu a thaw tuk kan ti. Asi nain cite cu a um lo le aitel lo ahcun ( Cite ) cu kan hlam ton. Sa kan i meh zong ah a thawttertu cu Cite , cun eiding thinghai hna  kan ei tik pohah a thawttertu cu Cite a si. Sa kan ei ca h kan ti a hal a si loin, cite cu a al .Sa  kan ei a si ahcun kan ti a hal . Cun Cite a umnak hmun poh ahcun thut ti a um bal lo. A si nain Cite cu mi zeihmanh nih cite na thawtuk tiah, zeitik hmanh ah hlawrh atong bal lo.

A pathumnak: Cite cu zeitik hmanh ah tlumlonak a ngei bal lo. Cite cu Siangpahrang inn ,,Mirum inn ,Sifak inn , Nuhmei inn , Pahmei in , Ngaktah le Mihrut inn zong aitlum. Cite cu Siangpahrang  inn lawng ah ka al lai i ,sifak inn ahcun ka al lai lo ati bal lo. Cun mirum inn ah ka al lai i, mihrut le nuhmei, pahmei le  ngaktah sin ahcun ka al la lo ati fon hoi lo. Cite kan zoh a si ahcun mizei inn chungkhat sin pohpoh ah a alnak kha aithleng bal lo. Cite cu siangpahrang inn ah siseh, mirum inn ah siseh, cun nuhmei pahmei inn ah siseh, cun sifak inn ah siseh, mihrut inn ah siseh a alnak kha ai khat dih. Mirum zongnih cite cu kan ngeih i, Misifak zongnih kan ngeih, Ngaktah zong nih kan ngeih, Mihrut zong nih kan ngeih i, Nuhmei zong nih kan ngeih. Mizei inn  poh nih  kan ngeih mi ai khat dih mi cu cite a si. Cu caah cun Cite hi kan zoh a si ahcun khawika hmun poh ah a alnak kha ai thleng bal lo i,a alnak kha hi ka ah ka al deuh lai i, hi ka ah ka al deuh lai lo tiah thlei dannak  angei bal lo. Cite cu tlumlonak hmun a ngei lo.

A palinak: Cite cu a alnak atlau a si ahcun cite sinak kha man a ngeilo. Hman awk zong atlak lo. Zeiruang ah dah Cite cu  a al lo ti a si ahcun, a thianglo mi thingthei te pawl kan chawh caah a alnak kha a hloh dih .

A panganak: Cite taktak cu zeitik hmanh ah a alnak a tlau kho bal lo. Nu le pa le u le nau hna a pakhatnak ka chim cia bantukin  Vawlei cung i a um mi misual  mi vialte (Siangpahrang ,Mirum , Sifak, Nuhmei ,Pahmei le Ngakṭah ,Mihrut zong nih Jesus Krih khamhnak cu  herhdih kan si. Jesus Krih khamhhnak a herhlo mi chungkhar kan um lo.

Jesuh nih nannih cu khamhnak lawng kan pek hna a kan ti lo .Vawlei cung a um lio ah khan miphun zakip sinah khuaruahhar phunzakip atuahmi thil kha kan hmuh. Mizaw adamter, kebei le mizeng mi hna an kal kho i, mit a caw mi nih khua an hmuh, kum hleihnih athi achuak  mi nu te zong adamter, khuachia khuavang zong aṭhawl hna i damnak an hmu. Arawl a ṭammi kha rawl apek hna ,a ti a hal mi kha ti apek hna. A si nain Jesus Khrih nih vawlei cung  mi vialte caah a nunnak tiang pek in a inn tuarning le a rian ṭuannak,  ṭhatnak a tuah ko nain zeitikhmanh ah  hlawrh atong bal lo.

Jesus Khrih nun kan zoh asi ahcun  siangpahrang inn zongah aitlum i, mirum inn zong ah aitlum , sifak inn zong ah aitlum i, Nuhmei le pahmei le Ngaktah inn zong ah aitlum i, Mihrut inn zong ah aitlum , Krihfabu chung zongah aitlum i Jesus nih  tlumlonak a ngeilo ti kha kan hmuh.

Jeus Khrih a zum mi  poh le a rianṭuantu an kehneh zultu hna  nihcun  khamhnak cu co kan si. Cun khamhnak kan co lawng kha a za lo. Jesus Khrih thiang thlarau kha kan chungah kan i nunpi chih awk  kha a herh . Pathian fa taktak kan sinak  zong kha zumtu nih kan  nunnak ah  kan langhter awk a si.

Asiahcun zumtu asi mi nu le pa, u le nau hna kan thinlung chungah tlumlonak kan ngei sual maw? Cun kei mah ti lungthin   kan ngei sual maw? Mikong kan chim tuk sual maw? Miphun ah kan buai sual maw? Mirum le sifak kan thleidan sual maw? Cun nang bu kei bu tiin, bu ah  thleidannak thinlung  a um sual maw ?

Kha bantuk in tlumlonak, thleidannak, mithang chiatnak , anih thawngṭha chim cu ka ei kho lo ti te hna, ka ram nih acelh loh ti te hna, nang bu kei bu ti in sawinak te hna, kei mah ti mi thinlungput kan  ngeih rih ko asiahcun Jesus Khrih khamhnak taktak le thiangthlarau  kan  co rih lo tinak  asi. A  al lo mi cite bantuk kan si tinak a si..

Ka hrinqhan ai timi le Pathian zumtu ka si ai timi nihcun tlumlonak kan ngei awk a si lo . Bu zong ah khan kan buai awk a si lo. Mi hlawrh zong kha kan duh awk a si lo. Khrih cu toidonak nun a ngei.

Cun kan bia chim  le kan nunning  ah khan Khrih hmuisam a langh awk asi. Jesus nih tlumlonak a ngeilo bantukin zumtu asi mi kan nih zong tlumlonak kha kan ngei awk a si lo. Bible ca chungah nan nih cu vawlei cite nan si a kan ti bantukin, Zumtu hna kan nunnak ah vawlei mi vialte caah Cite bantukin a al mi kan si khawh nak hnga Pathian nih thlachuah kan  pek piak ko seh. Bawipa Jesus Krih tu nih Sunparnak co seh. Amen

Donghnak Thlacam: A kan dawtu kan Pathian na fale kan can hmannak chungah deihnak he na thawngṭha bia kan i hrawm khawh caah na min kan in thangṭhat. Hi na bia hi na fale nih nifate kan nunnak ah kan i nunpi i lamhmuhsaktu asikhawh nakhnga thlua kan chuahpiak law lam kan hruai zungzal ko. Atang rihmi kan caan vialte na sinah chanhṭhan in kan Bawipa Jesuh min in thla kan cam kan Pathian   Amen.

--------------------------------------------------------&-----------------------------------------------------

www.vawngtuforchrist.blogspot.in