Josef Lungput

ZARHTENI CAANHMANNAK

Saturday, December 15, 2012

Visit VFC at www.vawngtuforchrist.blogspot.in
_____________________________________________________________________________

Caantlaitu                  :           Salai Tum Za Sang (Chennai, India)

Thawngṭha Chimtu    :           Pu. Jonah Lal Bik (Hyderabad, India)

Bible relnak le thlacamnak he kan caan thawk hna u sih

Salm 103:1-5:- “¹Maw ka nunnak Bawipa cu thangtthat tuah, Ka sining vialte a min thiang cu thangtthat tuah u, ²Maw ka nunak Bawipa cu thangtthat law zeitluk in dah zaangfahnak a ngeih kha philh hlah. ³Ka sualnak vialte kha a ka ngaithiam I ka zawtnak vialte kha a ka damter, ⁴thlan chungin a ka khamh I dawtnak le zaangfahnak he thluachuah a ka pek , ⁵ka nunnak cu thil ttha in a khahter I cucaah ka no peng I mupi bantuk in ka tthawng.” Kan dihlak caah Bawipa nih thluachuahnak kan pekpiak ko seh, Amen.

Thlacam hna usih: Dawtawk tlaklo a mifa hna a kan dawt i a kan kilven zungzaltu Bawipa na minthiang thangṭhat in um ko seh,atucan zongah na biathiang ihrawm kho dingin caanṭha caan sunglawi na kan pek  caah kan ilawm i na min kan in thangṭhat ko, Bawipa atu na fapa nih na biathiang  phuandingin aitim cang, nangmah nih ahmurka a leidang hmangṭhan law cuticun mi vialte caah ṭhathnem santlai asi khawhnak hnga thlua kan chuahpiak ko, Bawipa atu kan caan kan thawk cang lai ahramthawk alai dongh tiang  na Thiang Thlarau ṭhawnhnak in   rak kan telpi ko   tiah Jesuh min in thla kan cam kan pa Pathian. Amen.

Thawngṭha Chimtu Tuanbia Tawi: Pu. Johnah Lal Bik (Ṭial Hlei pa) cu Belhaar khuami a si i fanu pathum le fapa pakhat angeih hna. lbjonah@gmail.com cu 2000-2003 tiang Lai Baptist Church (LBC), Rangon, Myodagon ah Khrihfa upa aṭuan i, 2005-3008 tiang Vanbik Memorial Baptist Church, Kalay Myo ah Khrihfa upa arak ṭuan mi a si i 2008 ah Rhyma Bible College, Kalay Myo in B.Th degree adih i atu hi Senate of Serampore College (University) tangah a um ve mi Mennonite Brethren Centenary Bible College ah B.D kum dihnak akai liomi a si.

THAWNGṬHA CHIMNAK

Tlangpi: Josef Lungput

Pu. Jonah Lal Bik

Bible Thimmi: ¹⁸Jesuh Khrih a chuahning cu hitihin a si: A nu Mary cu Josef he khan an i ham i asinain an i umh hlanah Thiang Thlarau in nau ka ngei lai ti kha ahngalh. ¹⁹A hamtu Josef cu thil a hmaanning in tuah a duh zungzalmi a si; sihmanhsehlaw Mary cu zapi hmaiah ningzahter a duh lo caah an i hamnak kha a thli tein ka let lai, tiah khua a ruat lengmang. ²⁰Cu kong aruah lengmang lioah khan, a mang ah Bawipa vancungmi pakhat kha a sinah alang i, “David tefa Josef, Mary hi na nupi ca i lak awkah ṭih hlah. Zeicahtiah fa a pawimi hi Thiang Thlarau thawngin a si. (Mattai 1:18-20)

Biahmaiṭi: Vawngtu nu le pa, u le nau,mino hna nan zate, Bawi khrih min in nan kut kan thleih hna. Pathian nih nan rianṭuannak cio ah tlamtlinnak le thluachuah in pe ko hna seh. Nan sinah Christmas thawngṭha bia iruah ṭi awk ah caan a ka petu Salai Van Cung Lian, le arianṭuan hawi nan zapi cungah lunglomhnak tampi ka ngei. Tu kum 2012, December thla kan i hngahhlang tuk mi Christmas caan sunglawi hna kan vunphak khawh hi a varopui tak e…aw..! Praise the Lord….kan Bawipa Jesus Khrih nih sungparnak co ko seh. Amen.

Tuzing ah sawm kan duhmi hna cu Josef le Mary an i ṭhitumnak kongah harhnak (piahtana) an tonmi an phisinning hi zoh tuah hna usih.

Judah phung: Judah phung ah nu pakhat cu pa cungah  a sual ahcun Lungtum in thilak in an cheh i an chehnak Lungtum cu Pura tluk sang in aipawng (Deut 22:23-24,John 8:4, rel chih). An ihamnak in kum khat atlin hlan chung an i thium loh. Zeicatiah, Pa cungah a thian le thian lo an zoh ta hna.

Joseph le Mary ṭhitumnak: Josef le Mary (Matthai 1: 18-19) an tuanbia hi zoh tikah a fawi deng naisai lo mi i ṭhitumnak tuanbia asi. Joseph nih a vun i uart ukmi a nungak Mary he an iham chung i midang fa a pawi tiah a vunhmuh tikah zeituk khin dik ahei tuar lai mu. Mah le ṭanghma cio ah vun ibeh cio tuah ahcun Ti le Rawl zong ei zuam ti loin ballpen le catlap te kha vun ilak cawlh i mithli le hnapduk he zunngeih hla te kha vunphuah thluahmah buin thlavang tangah Kitar te he lungbo kip le tlangbo kip ah thu in  “Aluancia kan caan te kha tiin caanhman asi ko hnga lo maw?”. Asinain Josef lungput cu cuticun arak silo, alung aleng rua lo dah.

Joseph a lungput cu:

 (1) joseph cu dawtnak le zawnruahnak  lungput  ngei. Khua aruahmi a ṭhatning le thil acang laimi ahmuh khawhning cu khuasum, khuahna atuak cikcek mipa asi. Matthai 1:19b ah zapi hmai ah Mary asining kong phuan aduh lo e…a ti. Aruang cu aphuan ahcun lungcheh in athih ding asi (zaran pa hei si ahcun va ceiseh ti asi ko hnga. Zeitluk in dah zawnruahnak a ngeih i, Mary cungah a dawtnak ahmunh ti cu a ka in si loin alang lomi aziaza le a tuahserhnak in a mualpho lonak ding aizuammi pa asi. Josef nun ah kan hmuhmi cu Nu le Va kar ah Tlangval le a Nungak kar ah zumh ngammi nusal pasal ṭha kan si ve awk asi ti kha a langhter. Ka nupi hlei in a ka daw deuhtu dang an um ti lo ti zong hi pa pawl nih kan theih ding asi. Vuleicung ah ka hawikom ṭhabik cu ka nupi asi (mifim bia). Pathian nih nupi ca lawngin a kan pek si loin hawikom ṭhabik ah a kan pekchihmi an si.

(2) Josef cu harnak (piahtana) aton tikah ‘direct’ in biachahnak a tuah lo, “te lai”ah a thawn(postpone). I sikcaknak le buaibainak pawl cu thaizing ah tiah hei thawn law amah tein adai ko lai. Aṭha mi thil lei biachahnak cu a tu bakah bia chat cawlh ko. Thinhar lioah biachahnak tuah a hmangmi tampi um asi i khi nih khin tlamtlin lonak lei lam apanh pi ṭheu.

3) Josef cu vancungmi nih ‘apiahtana’ a hun phisin piak. Fa a pawimi hi tlangval dang sin in  asi lonak kong fiang tein an chimh pinah hmailei i thil achuak lai mi tiang an chim chih. Hawidawt, kan nih zong harnak le lungretheihnak vansangin kan um lio caan ah kan mah lawng irinh hlah u sih, harnak phisin piaktu a min ah Emmanuel kan ngei ti hi philh hlah. Minung cu rian kan ṭuan tikah tlamtling loin bantak kan hmang nain Pathian cu a fa le hna sin i rian aṭuan tikah hlawhtling te le aphi chuak tiangin a ṭuan tawn. Amah belte a cohlan zia kan thiam zong ahau kho men.

(4) Josef le Mary cu an nupa in an lungput ah Bawipa na bia ningin kan cungah sikoseh an ti khawh. Hihi pumpek nun asi (surrender), nawlzulhnak/nawlngeihnak (obedience) le sual phuannak (confession of sin)an si. Hi hna hi khrihfa kan zumhnak ah abiapi ngai mi an si hna.

Pathian cu dawtnak asi bantuk in nan innchungkhar le pumpak cung cio ah dawtnak alen khawhnak lai khrih nih arak phorhmi daihnak le hlawhtlinnak nan cungah tlung ko seh. Bawi Khrih min in salaam kan pek hna.

Donghnak Thlacam: Bawipa ahramthawk in alai dongh tiang na Thiang Thlarau in na kan umpi lam na kan hruai caah kan ilawm, Bawipa na fapa sin in kan theihmi na bia hi atheih long si loin a tak in kan inunpi khawhnak hnga pumpak pakhat ceu kan cungah thlua rak kan chuahpiak hram ko, Bawipa kan caan cu kan dihter cang lai atangmi kan nunnak kan caan na kutchung chanh in thla kan cam kan Pathian, Amen.

Lunglawmnak: Hibantuk in siaherhnak he thawngṭha a kan chimtu kan pa Ṭial Hlei pa cungah lunglawmnak chim cawk lo kan ngei tiah VFC aiawh in na sinah lawmnak bia ka chim. Hmailei zongah na rian tampilak ah siko hmanhsehlaw na rak kan zuampiak rih nak lai kan in sawm. (Salai Van Cung Lian, Secretary of VFC).

…………………………………………&………………………………………..

www.vawngtuforchrist.blogspot.in