Bawipa Pathian cu Kan Tuukhal Asi

Bawipa Pathian cu Kan Tuukhal Asi

By

Saya Zakhia (Van Bawi Cin pa)

Thawngṭha Chimtu Bible Thimmi:  ¹ “Bawipa cu tuukhal bantukin a ka vengtu a si, ka herhmi vialte kha a ka pek dih. ² Ramhring lakah a ka bawhter, dinh hmun ti pawngah a ka hruai. ³ Thazang thar kha a ka pek i a rak ka kamh bantukin ahmanmi lam ah a ka hruai.” Salm 23:1-3;

 ^11 “Tuukhal ṭha cu keimah hi ka si. Tuukhal ṭha cu a tuu hna caah a lu hloh kha a sian. ¹² Man phalhmi hlan chommi kha cu, tuukhal a si lo ca le tuu kha a ta an si lo caah, cenghngia le a rat kha a hmuh tikah a zam i tuu kha  a lektak hna. Cu tikah cenghngia nih cun tuu cu a she hna i a ṭhek dih hna”.  Johan 10:11-12

Hibantuk in thawngṭha bia thla kho ding le rel kho dingin kan nunnak lam a kan hrawitu kan pa Pathian min cu ahmasatbik ah thangṭhat si ko seh. Caan a ka petu nan cungah le khuami nan dihlak cungah lunglawmhnak ka ngei i Bawipa Pathian nih kan umnak cio hmun ah daihnak le hnangamnak kan peh cio ko seh.

Thlacamnak in thiangthlarau sawm hmasa hna u sih. ‘Ka pa na ṭha tuk e vuangtu mi fa hna kan nunnak lam nan ka hrawi i kan i lawm tuk, kan sin ah na thiang thlarau hmang in Tuukhal ṭha na sinak kong nan kan chim i kan i lawm. Vuangtumi fa kan dihlak cungah Bawipa Jesuh tuukhal ṭha kan si piak peng ko sawh tiah thla kan cam A men.’

Siangpahrang David nihcun Bawipa Pathian cu tuukhal bantukin aka vengtu asi ati. Ka ral hna lakah aka ven, teinak zawng Bawipa sin in ka hmu ti aifiang tuk. Muinak horkuang le thinak hmun in aka kham zungzaltu cu Bawipa Pathian asi ti hi a nunnak nih a pemh. Thazangthar a ka pek i lamṭha ah aka hrawi peng ton tu Bawipa lawnglawng hi asi tiin ahla phuah mi Salm 23 ah fiang tein kan hmuh khawh dih.

Zumhtu nang le kei the; akan hrawitu, kan nunnak akan ventu, Thiṭha in akan khahtertu le teinak le kan herhmi vialte akan pek zungzal tontu cu Bawipa Pathian hi a si ve hnga lo maw? Adawtnak le avelngeihnak thawngin a fapa ngeichun tiang zuah loin kan caah tuukhal piak dingah arak kan thlah piaktu Bawipa Pathian cu  thangṭhat si ko seh. Johan 10-11 ahcun Bawipa Jesush nih keimah hi tuukhal ṭha ka si a ti. Tuunkhal ṭha nihcun anunnak pek kha a siang i hlanchommi tuukhal a si lo. Hlanchommi tuukhal cu aman pek asi i atu pawl kha a ta an si lo i ral an rat taktak tikah cun azam tak hna pinah nunnak pek kha zeihtik hman ah a siang balmi asi lo.

Jesuh cu tuukhal ṭha taktak  asi caah cun dahkaw vailam cungah kan caah anunnak cu sian ngai in apeknak cu asi. Kan herhmi vialte a kan tuahpiak khotu cu Bawipa Jesuh lawnglawng dahkaw asi: Damnak, teinak , himnak, hnangamnak  le zungzalnunnak lawng siloin nan sin ah a zungzal in kan um pi hna lai ati . Halelluija.

Hawidawt aho hi dah kan tuukhal asi ti hi kan i fiang tak tak maw? Kan zulh tonmi Tuukhal hi aho dah asi? Bawipa Jesuh zulh loin Satan pa hna hi kan rak zulh peng ton maw? Jesuh kan zulhlo ahcun Setanpa kan zulh asi ko i kan zulhmi pa cio in a/an aw kan theih lai ti cu zumnak ka ngei. Bawipa Jesuh nihcun ka aw an thei i kei zawng nih an aw ka thei ve a ti dakaw. Khrihfa kum tampi si le a menmen lawng si hi abiapi mi asi lo. Tuukhal ṭha Jesuh aw theih le amah zawng nih  kan aw atheih ve hi abiapituk mi cu asi. Kum saupi Khrihfa si ṭung i Bawipa Jesush aw thei ballo le kan aw zawng athei khawh lo ahcun zeidah kan bau cio hna ti hi ruah awk um cang lo maw? Rumnak le thiamnak le sikhawhnnak te hna le vawlei pumsa duhnak te  hna le din le zuk le hmawm te hna pawl hi Khrih kan Bawipa a aw kan thei khawhnak ding lam aphihtu an si sual maw?

Johan 10:7 ahcun biatak kan chim hna, Tuu luhnak kutka cu keimah hi ka si ati. Keimah cu innka ka si a ti chi rih fawn. Keimah ah alut mi cu khamh an si lai a ti           ṭhan. Cun an lut an chuak lai i ram hno kha an hmu lai. Miphun dang le misual mi hna, kan caah cun Bawipa Jesuh lawnglawng hi zungzal nunnak innka cu asi. Amah sin ah kan luh hnu ah dakaw khamh kan si lai cu. Kan luhnak ding hna kan nih fiang rih lo ahcun aw, nu le pa Khrihfa si ruang hna ah  Khrihfa mi sawhsawh kan si rih tinak a si ko hnga. Tuu run si ve loin maheh hna le caw run hna kan si i kan duhmi le kan tuahmi vialte hi kan puṭhing asi mi setan pa calawng hna asi ahcun ngeihchiat tuk kan si hna. Hawidawt kan nikhua hi theih khawh asi lo aw, caan par te ah a um mi kan si hna,  kan ni biatak a hau cang i biatak cu Bawipa Jesuh hi asi i lam le nunnak zawng a mah asi. David nih cun na inn cu ka inn a si zungzal lai ati ngam dakaw. Nang le kei teh zungzal kan inn hi khoika dah a um i Bawipa Jesuh nun aa ngeih cangmi nih cun David siangpahrang bangin kan chim ngam ve ding asi.

Kei cu aw Tuukhal ṭha ka herh lo tiah kan iruah sual tawn maw? Fimnak le Thiamnak le rumnak hna hi cu hi vawlei kan nun chung ca lawng dakaw an si. Hi vawlei pi hi  a ning pi hman in co hman u sihlaw nunnak kan sungh ahcun zeihman sullam a ngeih lo a ti. Bawipa Jesuh nih nifatin in nan vailamtah iput in ka zulh uh a ti. Mah le mah ihuat in ka zulh uh ati rih fawn: kan pumsa duhnak vialte kha huat in tuukhal ṭha kan zulh kha  asi hawi dawt. Hi vawlei cungah Tuukhal ṭha in aratnak aruang cu zungzal nunnak kan ngeih khawhnak, teinak le hnangamnak le fapa roco tu kan si khawhnak  caah asi. Nifatin kan nunnak lamthluan ah Thaingthlarau sawm bu tein Tuukhal ṭha Jesuh a zulh peng mi le a aw thei in le kan aw thei ve in karh hlan  hna uh sih. Pathian penhnak ah um kho peng  dingin Bawipa Pathian vel asi  mi Thiangthlarau  sawm peng hna uh sih. Kan mah kha lam hrawi ding le kilven peng ding le zungzal nunnak ihrawm kho  dingin kan hmai ah akal cang mi kan Tuukhal ṭha Bawipa Jesuh zoh peng hna u sih.

Ka pa na ṭha tuk ee na fapa Jesuh hmangin zungzal nunnak inn, fapa rocotu le kan sual ngeihthiamnak le Tuukhal ṭha Jesuh hmangin na sin ah na kan kirter ṭhanmi hi asunglawi  tuk ee. Kan chim khawh mi thawngṭha hi Bawipa Pathian nih thlua kan chuah piak hram ko seh.

………………………………………………………..

Vawngtu for Christ

“Thawngṭha cu Kan Zahpi Lo (Rome 1:16)”