Ka Dawtmi Ka Fa Na Si

VAWNGTU FOR CHRIST

Zarhteni Caanhmannak

Saturday, January 19, 2013

Visit VFC at www.vawngtuforchrist.blogspot.in

Thawngṭha Chimtu Konglam: Pu. Ceu Mang le Pi. Sung Vang i an fapa upa bik Pastor. Sang Kio cu 2005 ah Mainuai St. Padrepio Bible College in sianginn a kan dihpiak. Leitak (B) ah kumthum chung Pathian rian a ṭuan hnu ah 2008 kum ah Thantlang Parish zung ah aa thial i atu hi Thantlang ah rianṭuan in an chungkhar he khua an sa.

Thlacam Cahnak: Nihin thawngṭha a kan chimtu kan u, kan nau, ka fa a si mi Pu. Sang Kio le achung khar caah thlacampiak hna uh sih law, an rianṭuannak ah Pathian nih a telhpi hna nak hnga thlacam in bawmh ṭhan hna uh tiah kan in sawm hna.

Thawngṭha Chimtu Hmurka: Hibantuk in chanṭha a ka petu kan Pathian cungah lawmhnak tampi ka ngei i thawngṭha chim a ka thiah  tu, rian ngeitu nan cung zawngah lawmnak ka ngei. Hmun kip i a um mi kan khuami dihlak cungah kan biak mi Pathian nih in um pi ko hna seh, tiin nan kut kan tlai hna.

Tlangtar: Ka Dawtmi Ka Fa Na Si

Pastor. Sang Kio

Bible Thimmi: ²²“Thiang Thlarau cu a pum in ṭhuro bantukin a cungah cun a rung ṭum. Cun vancung in aw pakhat a rung thang i, ‘nangmah cu kan dawtmi ka fapa na si. Na cungah ka lung alting,”tiah a ti. (Luka 3:22)

Khrih ah dawtmi u le nau, nu le pa, MINUNG hi Pathian mui keng in ser kan si ko nain, Adam le Eve  ruangah Pathian fa kan sinak a tlau, phundang in kan chim ahcun Khuachia fa ah kan cang. (Jonh 8;44) chungah, Nannih cu nan pa, khuachia fa nan si a ti bantukin kan si taktak. Sihmansehlaw (Rom6;4) chungah cun, ti chungah tipilnak kan vun in ah khan a mah he vuiṭi kan si a ti bantukin Khrih a fa ah ser kan si. Cucaah (Gal 4:6) chungah Pathian fa nan si caah khan Pathian nih a fapa  thlarau  cu nan chungah a run thlah i, cu thlarau nihcun  ‘ka pa, ka pa’ tiah a au a ti.

Jesuh cu ti chung in a thawh bak ahkhan acung ah ai fu mi thlarau cu nang le kei kan lungchung ah khumh mi thlarau  he ai khat mi a si i, cu thlarau cu pakhat a si. Cun van in aw pakhat nih cun Nangmah cu ka dawtmi ka fa na si a ti . Cu aw cu nangmah zong na thei ve maw? Nang le kei zong Jesuh Khrih nih KA DAWTMI KA FA NA SI a kan ti ve. Cucaah Khrih dawtmi fa kan si hi ilawm ko hna uh sihlaw a min thangṭhat ko hna uh sih.

Cun, cu aw nihcun na cungah ka lung a tling  a ti. Ka fanu a hniang nu te hi a u le lakah ai dawh lobik a si. Cun a tu lio lebang cu khua nih a sik i a hmai te hna hi a caak kho tuk, a hnap nih le a tam fawn, kal le a kal thiam rih hawi lo, a si nain ka duh ning hi a mak, ka dawt kho tuk, ka tleihchan ning hi ka chim thiam lo, mi nih aa dawh lotuk an ti zongah ka hmai ah cun aa dawh tuk. A vun ka nih piak lebang ahcun kai lunghmuih kho tuk i ka lung zong a tlingtuk. Ka chim duhnak cu Pathian caah zei hmanh kan tuah kho lo zongah siseh, kan i dawh lotuk zongah siseh, ṭhatnak zeihmanh kan tuah kho lo zong ah, kan cung ahhin a lung a tlimgtuk ve ko dakaw, cucu kan mah tuahsernak thawng siloin Khrih a thi thawng in le a vel thawng in a si.

Jesuh cu tipil a in hnu ah avoikhatnak a tawn mi cu TUKFORH nak asi. Nang le kei zong, cu tukforhnak cu kan tawn ve lai. Zeicahtiah Khrih a fa kan si caah a si. Tukforhnak kan in bal lo ahcun Khrih faṭha kan si rih lo ti a fiang. Zeicatiah cun tukforh kan herh ti lo ruangah a si. Phundang in kan chim ahcun Setan lei kapin kan um cang caah a si hnga.

Mathai 4:9 chungah cun khuachia nih Jesuh a tukforhnak kha kan hmuh. Pathian fapa na si ahcun lung hi changreu ah i cang ti hngat, tiah a ti . Jesuh nihcun minung hi, ti le rawl lawngin a nung kho lo, Pathian ka in a chuak mi cu nunnak a si a ti. Setan nih Pathian fa na si ahcun a ti bangin Pathian fa a si mi Khrih a fa le hna, nang le kei  zong hi kan paw le kan awr  ruangah, le chaw le va, inn le lo ruangah  maw kan zumhnak/kan zumhmi Pathian hi kan pial taknak hnga lo thlacam uh sih.

Tlangkomh: Sualnak ruangah a thi cang mi kha nihin ah khamhtu Khrih nih ka dawtmi ka fa tiin a kan auh ṭhan cang. Dopawvawngtu mingsaw cawtah a buipawtah Bonghnang masawng paky seh. Amen.

………………………………….&……………………………….

Vawngtu For Christ