Thlacam Ṭhawnnak

VAWNGTU FOR CHRIST

Zarhteni Caanhmannak

Saturday, January 13, 2013

Visit VFC at www.vawngtuforchrist.blogspot.in

Donnak: Kan umnak le kan ṭuan kawlnak cio ah adawtnak he lam a kan hruai i damnak le lawmhnak he a kan umpi i tuni/tucaan zongah abia in thazang lakṭinak canṭha cansunglawi a kan petu kan Khuazing aminthiang thangṭhat si ko seh. Thlacamnak he thawngṭha ihrawmṭi ṭhan hna uh sih law, thazangthar lak ṭhan dingin kan in sawm hna.

Thlacam Cahmi:

1.      Ramkip um Vawngtu tefa hna caah le khua ah kaltakmi khuami dihlak le Khrihfabu caah

2.      Ramchung ram leng Vawngtu tefa Pathian rianṭuantu hna le unak lei rianṭuantu hna caah.

3.      Vawngtu tefa ramchung ramleng sianginn kaimi dihlak caah

4.      Hakha-Vawngtu-Lungbun motor lam phuanhpuai caah

5.      Lungsamat kan tuahcuahmahmi tlamtling tein kan limkhawhnak ding caah

6.      Vawngtu khua ah Ciangkhanzi le Chin National Party (CNP) party pahnih hna kharlak ah rualremnak le dawtnak he rian an ṭuanṭi khawhnak caah

7.      Hydro-electric caah

8.      Harnak lakah khua aza mi Kachin kan unau hna caah, thlacamnak kan umnak cio ah kan rak ngei cio nak lai kan in sawm  ṭhan rih hna.

9.      Tuni thawngṭha a kan chimtu Salai Za Cung Lian ca zongah thlacamnak in bawmhhram hna uh sih.

Thawngṭha Chimtu Konglam Tawi: Thawngṭha a kan chimtu Salai Za Cung Lian (z.cunglian@gmail.com) cu kum 2010 ah  Yangon ah B.Th adih I, atu hi Yangon ah a um lio a si.

THAWNGṬHA CHIMNAK

Tlangtar: Thlacam Ṭhawnnak

Salai Za Cung Lian

Baibal cang thimmi:  ¹⁵“Zumhnak in thla an camnak nih khan a zawmi kha a damter lai; Bawipa nih damnak kha a pek ṭhan i sualnak a tuahmi kha ngaihthiam a si la.” (Jeim 5:15).

Biahmaiṭi : Nungak tlangval can saupi aa dawtuk cang nain pakhat le pakhat aa chawn bal lomi an um hnga maw? An um ahcun khuaruahhar ngai a si hnga. Asuallam cu dawtnak le theithiamnak an ngei lo tinak asi ko. An karlak ah dawtnak a um lo. Thlarau leiah hi bantuk thil tampi a um tawn a si. Aruang cu thlacam tlawm tuk ruangah a si ko. Cucaah cun Bawipa he ipehtleihnak a rawk i a rauhhlan ah thlarau nun a rocar.

1. Zeithil na ton zongah Pathian leiah i mer u law thlacam u tiah Baibal nih a kan cawnpiak. Zeizong thil kongah thlacam a kan fial (File. 4 : 6 ). Ngol loin thlacam uh, (1 The. 5: 17). Minung nih kan herhbik mi cu damnak a si (5: 14-15). Nihin kan khua kan ram a dam khawhnak dingah le ramchung ram leng i a ummi dihlak zawng nih taksa, thinlung le thlarau in damnak kan hmuh i kan tuah-ṭuanmi mi cungah Bawipa lamhruainak a um zungzal khawh nakhnga Pathian lei ah i mer usih law pumpek thlacamnak a um a herh.

2. Thla kan cam tikah a hal lei lawng si loin thangṭhatnak le lawmhnak kan pek ding hrimhrim asi. Lawmhnak ngeih hi thlarau nun pakhat asi. Pathian dawtnak cu thinlungah a nun ahcun lawnhnak chin lo khawh asi lo (Salm. 95: 100).

3. Matt 5: 1 chungah  " Thla nan cam tikah mi depde pawl nih an cam bantuk in cam hlah u " a ti. Hibantuk thlacamnak hi cu chunglei in duhnak le zumhnak taktak a um lo, lenglei zohdawhnak le minung nih theihkhawhmi ca tiang lawng a si. Pathian sinah a phan kho lo. Thinlung tak loin thlacam te hna hi Bawipa nih a thei lo (Matt. 6: 7).

4. Sualngaichih le sualphuan in thla kan cam hrimhrim ding a si : sualngaichih in thlacam ahcun miphun, khua le ram le khrihfabu chungkhar damnak a si. Sualngaichih  lo le thinlungtak lo  thlacam cu Pathian  nih a cohlang lo. Pathian cu sualngaichih in thinlung innka hunpiak usih law a dikmi thil kha kan hngalhter seh. Pathian sin ah kan sining zeizong vialte chia dih, apdih ko hna usih, cuticun a mah nih pehthaihnak a kan hmuhter ko lai.

5. Thlacam tikah zeibantuk thlacamnak khi dah Bawipa nih a cohlangmi cu asi, chunglei in aputmi  thinlung tak nih a cam mi kha a duh. Bawipa cu lenglei zohtu siloin chunglei nunnak a zohtu asi. Thlacam hmual cu zumhnak le duhnak taktak ah hram aabunh. Elijah thlacamnak kan zoh a si ahcun Elijah kha ruahsur lo nak dingah zumhnak in thla a cam i kumthum le cheu ruahsur loin a um. Cun ruahsurnak dingah Karmel tlangpar ah a kal i vawlei ah khupbil in thla a cam ṭhan tikah ruah cu fakpi in a sur ṭhan i vawlei nih tirawl a vuiter (5: 17- 18). Cucu chunglei in  ipeknak le zumhnak thawngin thlacam ruangah asi. Nu le pa u le nau hawikawm dawt hna, kan khua kan ram a damnak caah le a chung i a lengmi minung vialte, taksa thinlung le thlarau in damnaktling kan hmuhkhawhnak hnga zumhnak in rawlulh usih law thlacam ko hna usih. Kan vawlei nih ruahti ṭha a hmuh i kan vawlei ti le ram hna nih, tirawl ṭha a vuiter i a chungum mi minung zawngnih thlarau lei van ruah-hang-dapti ṭha a hmuh i Pathian sunparnak caah theipar ṭha a chuaknak dingah Bawipa sinah khupbil in mithli he kan thinlung dihlak in thla cam ko hna usih.

Moses nih Israel mi hna nih Pathian sinah an sual cangti a thei tikah Pathian sinah pumpek in thla a cam i Israel mi cu vancungmi nih lam an hruai ṭhan hna (Exodus. 32: 31-32). Hika zawnah Moses thlacamnak kan zoh a si ahcun a miphun hna nih sualnak chungin an luat i Pathian lamhruainak an hmuh khawhnak dingah a nunnak pekin Pathian sinah thla a camnak kan hmuh. A miphun hna caah a nunnak sunghding tiangin thla a cam.

Tlangkomh: Thlacam cu minung le Pathian kan i pehtleihnak a si i lungtaktein cam ahcun hmual a ngei.

………………….

www.vawngtuforchrist.blogspot.in