Zumhnak Nung Kan Timi Cu!

VAWNGTU FOR CHRIST

Zarhteni Caanhmannak

Saturday, January 5, 2013

Visit VFC at www.vawngtuforchrist.blogspot.in

Donnak: Zarhkhat chung rian kan ṭuannak le kan um kalnak cio ah Pathian nih a kan umpi i VFC hmangin thawngṭha ihrawmṭi khawhnak caanṭha a kan petu kan Pathian aminthiang thangṭhat si ko seh. VFC careltu vialte le khuami dihlak nan kuthnem kan in tleih hna. Pumpat nan cung cio ah kumthar lawmhnak le thluachuah tlung hram ko seh.

Thlacamcahnak:  

(1). Tuni thawngṭha a kan chimtu Van Bawi Cin pa cungah VFC nih lawmnak tampi kan ngei. Amah pumpat le a inn chungkhar caah thlacam piak hna uh sih.       

Thawngṭha Chimtu Tuanbia Tawi: Saya Za Khia (lianchinkhia@yahoo.com) cu 2007 ah New Delhi, India ram ah Bachelor of Theology (B.Th) degree cu tlamtling tein adih i, 2010 ah an chungkhar in US ram ah an kal. Pathian nih fanu pakhat le fapa pakhat thlua achuah hna. US ram ah Khrihfa upa OB aṭuan lio pi a si.

THAWNGṬHA CHIMNAK               

Tlangtar: Zumhnak Nung Kan Timi Cu!

By: Saya Za Khia (Van Bawi Cin pa)

Bible Thimmi Relnak: ^3  “Pathian nih vel a ka ngeih caah a ka pekmi laksawng ka hmuhmi thawngin hi bia hi nan dihlak sinah ka chim: Nanmah le nanmah kha a sang tuk ah iruat hlah u. Nan siningte tu kha i hngal u law Pathian nih zumhnak an pekmi hna ning cio ah nanmah le nanmah nan iruah cio ning cu si seh.” (Rom 12:3)

Lawmhnak: Dawtmi U le Nau hna, nan zate cungah kum thar daihnak le lawmnak nan cung cio ah um ko seh .Kei mah zawng Thawngṭha chim dingin caanṭha ,can duhnung nan ka pek ve caah rianṭuantu , Vawngtu for Christ upa  le ramleng um khuanu khuapa nan cungah lawmhnak ka ngei .

Thlacamnak: Ka Pa , na bia cu nangmah nih chim ṭhan ko tiah kan sawm i, na chim cang ti ka zumh caah ka lawm. Kan Bawipa jesuh min in thla ka cam. Amen.

Biahmaiṭi: Pathian fa le nih cun ',zumhnak kan ngeih lo ' tiah kan chimding a si lo, zeicahtiahcun Pathian nih pakhat cio hi zumhnak a kan pek cio ko caah a si. Asikunah , zeiruangah dah  a ceu zumhnak hi a ṭhawng deuhmi a lawh i ,a ceu zumhnak hi a der ngaimi asi kun?

Hitin chim hmanh u sih: zumhnak cu thahri thazang bantuk a si. Kan chuahka tein thahri thazang ngeihcia in kan chuak. A si nain a cheu  bomban cu a ṭha deu tawn. Zeicahtiah nifatein , fel tein ekseksai an tuah caah a si.Cu bantuk a tuahmi hna cu , an pumrua zoh aa dawh, thazang an ngei i, nikhat hnu nikhat in an ṭhawng chinchin lengmang.

Cubantuk tein zumhnak zong hi rawl pek in  cawlter peng a herh. Biadang in kan chim ahcun ekseksai tuahpiak ve a hau.Cuti aa cawlmi cu zumhnak nung kan timi  cu  a si. Pathian bianung chim buin kan zumhnak kan cawlter ahcun a ṭhang hrimhrim ko.Zeicahtiah, zumhnak cu bia theihnak thawng khan a um i, bia cu khrih kong chimnak thawng khan a um (Rom 10:17).

Asullam cu, Pathian nih a chimmi  cungah aa hngatmi kha zumhnak  nung cu a si. Cucaah Pathian hngatchan buin, bochan buin, kan tuahmi kha zumhnak a cawlcang kan timi cu a si.

Tahchunhnak kan chim ahcun ,harnak tihnung  kan tong, cu harnak cu zeitindah kan tei lai, kan ton ngam lai maw, kan hrial lai maw, kan pahchih lai dah?...tbt..in khuakhannak kan ngeih hlanah zumhnak in cawl hmasa aherh. Philh lo ding cu; zumhnak cu Pathian cungah aa hngat mi a si, kan ti cang khah.

Cubantuk nun nih a chuahpi mi cu a tluang i , a kalning zongah aa dawh i, teinak le ṭhannak a chuahpi.(2Chanrelnak 20 chung rel chih,Siangpahrang Jehosaphat kong kha,hriamnam le ralkap zuanhnawh hmasa lo in Pathian tu a zuanhnawh hmasa..Halleluija.)

Cucaah meeting tuah lai ah thla kan cam tawnnak cu kan meeting hi  a tluang hrimhrim lai tiah kan zumhnak alanghnak kha a si.Rawl ei lai ah thla kan cam tawnnak cu kan rawl hi thluachuah pekciami a si hrim hrim ti langhternak a si. Zeizong kipah Pathian na banh hmasanak, na zuanhnawh hmasanak cu zumhnak nung kan ngeih caah a si.

Pathian caah thilhme ,thilngan ti a um loh. Zumhnak in maw a fuh, asiloah thildang in dah, ti lawng hi a kan dantertu asi .'Thla na cam tikah , nan halmi poah kha , kan hmuh cang ,tiah zumh uhlaw nan hmuh ko lai (Marka 11;24) tiah kan Bawipa Jesuh nih a kan chimhmi kha philh hlah .Zumhnak in hmuh  hmasa kha  akan fialmi  asi, cucaah  azawmi nih Jesuh cu kan damnak a si, chim peng ko u sih.Harsami hna nih Jesuh cu kan rumnak a si tikha chim peng ko. Atlamtling lo hna nih Jesuh cu kan tlamtlinnak  a si tikha chim peng ko. Siibawi  kan ton tikah zumhnak in tong ko. Rian kan kawl tikah zumhnak in kawl ko . Sii tlangkhat te kan din zongah zumhnak in ding ko.

"Ka Pa ,siibawi ka tong cang lai .Nangmah nih fimnak naa pek cangmi a si i, keimah caah a ṭhabik in zawtnak zong a hmuh khawhnak hnga  fimnak pe ko .Ka damnak cu siibawi pa cungah aa hngat lo, nangmah  lawng lawng ka damnak na si ' tiah chim ko.Cucu zumhnak nung cawlcangh ning cu asi. Dawtmi U le nau hna,  kum thar  kan lam thluan ahhin zumhnak nungin  Bawipa Pathian fuh hmasat hna u sih. Hawi dawt Pa Pathian fuh loin  thildang hna hi kan fuh  hmasat ton Maw?

Cuticun, kan zumhnak cu kan taat lai i kan haar ter lai.Kan cawlcanghter lai i ,ekseksai kan tuahpiak lai .Cutik ah, kan thlarau nun cu a ṭhawng chin lengmang lai. Zeithil poah kha zumhnak in kan fuh, kan ton ahcun mitthli hmanh a hul i, lungre theihnak tlangngan pipi cu an i thialmanh e, kan ti ko lai . Zeicahtiah, kan zumhnak pei a cawl cang cu.

A si ,ka Pa, zumhnak nung na ka pek caah ka lawm. Sunparnak cu nangmah ta si zungzal ko seh. Amen.

Thongthanhnak: Ara laimi January 12, 2013 ah kan umnak hmun cio in rawl ulh thlacamnak kan ngei cio hna lai. Thimhtuahnak kan rak ngei cio hna nak lai kan in sawm hna.

…………………

VAWNGTU FOR CHRIST