Khrih Kan Thlau Ve Sual Maw?

KRHIH KAN THLAU VE SUAL MAW?

Pastor. Sang Kio

Atutan ah thawngṭha chim dingin canṭha ka hmuh ṭhan caah Pathian cung le cantlaitu nan cung le thawngṭha aihrawm mi khuami nan dihlak cungah lawmnak ka ngei. Thawhṭhan hnu ni 40 ah Khrih van cungah akai i 10 ah thiang thlarau aṭum a si caah, cu ni kan phak hlan cu thawhṭhan caan a si ko caah thawhṭhan thawngṭha kan ihrawm rih ko hna lai hna. Khuami dihlak nan umnak cio ah Pathian nih thluahchuah in pe ko hna seh. Amen

Khrih ah dawtmi u le nau hna,  Khrihfa kan si i zumtu kan si bantuk in Jesuh thawhṭhannak hi um hlah sehlaw Khrihfa kan si hnawh chan a um lai lo i thawngṭha zawng a um hnga lo, Jesuh cu a pa sin ah thla a cam lioah ka pa hi hrai hi ka thial piak ko, sihmansehlaw nang mah duh bang si ko seh tiah a ti. Cu bia cu aithih pi i kan caah vailam ah khenhchih in  a tuar, nangmah le keimah kan nun ah ta khuaruah har vansan in kan um lioah thla kan cam ve cu sikaw kan mah duhning in siseh tiin maw kan cam, nang mah duh bang si ko seh kan ti dah? Asi ahcun cu harnak kan cung a thlun tikah kan tuar ngam ve maw? Vuivai in kan um maw? Kan Pathian caah kan nunnak kan pe kho tak lai maw? Mi tampi cu kan thlau thio, atu lioah alar ngaimi cu kan innka cung tlangtar te hna, cun Gtalk  ah kan tial thio mi cu {Jesuh  cu Bawi Asi } tihi kan itar i kan ṭial cio hna , asinain kan pawcawmnak ah kan mah le sining cio in kan ṭuan, kan cawl cang cio i kan pumsa caah caan kan pek dih i thlarau caah  cun caan kan pe kho ti  lo tikah kan thinlung ah le kan chungkhar ah cun Jesuh cu Bawi ka siter tilo i  kan Innkaa te pawl ah Bawi ah kan ser, ka chim duhmi cu kan innkaa cung le hmuh khawhmi ah Jesuh cu bawi a si ti kha ṭial loin kan thinlung chung tu ahhin i ṭial uh sihlaw i nunpi ko hna uh sih .

Mary cu thlaan cungah cun lei a va bih kho bakin ahnulei a hun imer lioah Jesuh ahmuh, asinain ahngal lo, aruang cu aṭah lio pi asi i a mithli nih fiang in khua ahmuhter lo ruangah asi. Dawtmi khuami hna, hi vawlei kan khualtlawnnak ahhin ngeichiat lungkuai le mithli he zunngaih in kan um lio caan le sungh zathlaknak kan ton lio caan ahhin maw Khrih hi rak thlau in rak palh ve sual afawituk hringhran, fiang deuh in vun zoh ṭhan hmanh nangmah hnemh awk ah Khrih cu na pawngah adirmi ko, na biakmi le an dawt i an hlawtlo tu cu Jesuh Khrih a si.

Mary nihcun Jesuh cu dum cawngtu ah a rak ruah, aruang cu mary lungthin ah Jesuh cu a tlau cang caah a si, zumtu mi tampi kan nunnak ahhin kan pumsa duhnak le kan pawcawmnak ah kan cawl caan lioah chaw le va kan kawlnak ah thiang thlarau caah caan kan pe kho tilo ruangah kan thinlung chung ahhin Khrih cu kan thlau i kan pawng kam i sifak santlai lo pawl le ei awk, din awk ngei lo ngakṭa hna khi Khrih an rak si kha kan hmu kho tawn lo. Cucaah na nunnak le na thinlung chungah Khrih na thlau sualnak hnga lo dawn khamtu thilchiahta in Khrih  azoh pengmi Khrifa ṭha si hi izuam hna uh sih.

Thawngtha aihrawm mi nan dihlak cungah Bawipa nih thiang thlarau in  inkhahter ko hna seh. Amen.