VAWNGTU FOR CHRIST
Zarhteni Caanhmannak
Saturday, December 29, 2012
Donnak: Thawngṭha ihrawmṭi khawhnak caanṭha caan sungluai akan petu kan Pathian amin thiang thangṭhat si ko seh. Kan Bawipa Jesuh Khrih chuahlawmhnak nisung zong thlamtling tein kan umnak cio ah kan hmang kho caah kan Khuazing le Pathian amin sungluai cu thangṭhat si ko seh. Khrih nih hi vawlei ah aratpi mi daihnak, hngangamnak, nundamnak le rualremnak cu kan zatein nunnak ah um hram ko seh. Kumthar zong thlamtling tein kan umnak hmun cio ah kan hmang ṭhan kho nak lai thlaza cam cio hna uh sih tiah kan in sawm hna. Nihin kan caanhmannak careltu le thawngṭha reltu kan dihlak le fanau rualchan vialte hna cungah Pathian thluachuah tlunghram ko seh.
Thlacamcahnak: (1). Rev. Siang Lian hmangin Zyphe Christiasn Fellowship, New Delhi ah crusade an tuahlio a si. Rev. Siang Lian caah thlacampiak ṭhan hna uh sih law, bawmhtu Thiang Thlarau sawmpiak ṭhan hna uh sih. Crusade cu December 26, 2012 in thawk asi i chun zan in cawnpiaknak a ngei khawh hna. Thimhtuahnak an ngeih bantuk in December 30, 2012 ah tlamtling tein an dih khawh nakhnga thlacam bawmh hna uh sih.
(2). Lam cawhcuahmahmi Lunbung-Tluangram-Vawngtu lam tlamtling tein an dih khawh i phunhpuai zong kan itimhmi ni le caan tein ah kan tuah khawh nakhnga thlacam dingin kan in sawm hna.
(3). Nihin ah thawngṭha a kan chimtu Rev. Siang Lian (David pa) le a chungkhar caah thlacampiak hna uhsih, Pathian nih a sianginn kainak le rianthiang aṭuannak cungah a umpi nak hnga Pathian sinah thlacam piak hna uhsih.
Thawngṭha Chimtu Tuanbia Tawi: Tuni thawngṭha akan chimtu hi Rev. Siang Lian asi i amah hi Chin Association of Baptist Churches, Hakha ah kum 6 chung Pathian rian a ṭuan cangmi asi. 2005 Kum ah B.Th degree cu Myanmar For Christ Bible College and Mission, Kalaymyo ah alak i, atu hi Indian Theological Seminary, Chennai, India ah M.Div II nak, (a kumhnihnak), akai lio asi. Rev. Siang Lian le achungkhar Ṭha Chin Par cu Pathian fapa pakhat, (amin ah David Sang Bik Lian), thlua achuah hna.
Thawngṭha Chimnak:
Tlangtar: Bawipa cu Kan Teinak Aalan Asi
Rev. Siang Lian
Thawngṭha Chimtu Bible Thimmi: Exodus 17:15-16, 15“Moses nih biakṭheng pakhat a ser i amin ah, “Bawipa cu ka hmelchunhnak puanzar a si,”a ti. 16Moses nih cun aa thawh i, “Bawipa hmelchunhnak puanzar cu i tlaih uh! Bawipa nih Amalek mi cu a zungzal in a doh hna lai,”ati.
Biahmaiṭi: Israel mi hna nih ral an doh ahhin anmah ṭhawngnak an ibochan i, fimnak an ibochan ahcun ral an sungh tawn, aruang cu an teinak taktak cu Pathian a si. Cucaah Mosesnih ral kan doh cang lai ati ahhin Pathian a auh hmasa i Pathian sinah a chim hmasa.
1. Bible ah kan lut hna lai; Moses nih Amalekmi he kan i doh lai ti atheih cangka in atuah hmasami cu rian a phawt hna, rian a khin hna. Joshua kha a auh i nangnih nih ral nan doh lai i, keimah le Aaron le Hur nih thla kan cam lai a ti, Moses nih a chimning tein an tuah.
2. Joshua le a ralkap hna nih ral an doh ahhin anmah lawng an si lo bomtu an ngei, cucu a hodah a si ti ahcun Moses le Aaron le Hur an si. Tlangcung in an bomh an chanh hna, zeidah an tuah?, Moses nih Pahian nih a pekmi ṭhiangthunh kha a hler. Aaron le Hur nih an zoh sawhsawh lo. Moses a re a thei maw thei lo ti kha an zoh.
3. Moses a re a thei cangka in an bomh, zeidah an tuahpiak? LUNG cungah an ṭhutter, cu lawng cu silo Moses ban kha an tleih, an dohpiak, cucaah Israel mi hna nih ral an tei. Moses nih a ban a hlei chung poah cu ral an tei, asinain athlak deuh paoh ahhin an ral pawl nih an nawr hna. Moses lung cungah a ṭhu i Aaron le Hur nih an bom hnu hna lawngah Israel mi nih ral an tei.
-Ṭhiangthunh nih a hmuhsaknak cu Vailamtahnak hmuhsaknak si. Kan ral teinak hi Khrih vailamtahnak lawng a si
-Lung nih hmuhsaknak cu Jesuh hmuhsaknak si, kan ral teinak cu Jesuh lawng si.
Adongnak ah Moses nih a ṭhiangthunh ahler ahhin bomtu a ngei, cun aṭhutnak hi lung a si, nihin kan nih khua zong rian kan ṭuan i thla kan cam tikah Jesuh ah iṭhumh ko u sih. Jesuh hi ihngat ko u sih. Kan teinak, kan ṭhawnnak, kan damnak, kan himnak, kan ilawmhnak cu Jesuh lawnglawng a si. Moese le Aaron le Joseph le a ralkap hna an nunning kan zoh ahcun Pathian an ibochan lawng siloin rualremnak le lungrualnak an ngei. Rualremnak le lungrualnak he kan theinak Khrih ah ihngatchan hna usih.
Thongthanhnak: Ara laimi January 12, 2013 ah rawlulh thlacamnak kan ngei hna lai. Ramkip um khuami dihlak nih Vawngtu For Christ sinah thlacam nan rak cah cio nak lai kan insawm hna. Thlacam cahmi kuatnak cu vancunglian09@gmail.com asiloah VFC website Pehtlaihnak ahhin kuat khawh a si.
…………………
No comments:
Post a Comment
Your Comments are Welcome!!!