Kan Ram Dam Ve Cang Seh

Tlangpar: Kan Ram Dam Ve Cang Seh

“Let Be Healed Our Country”
Salai Tial Hnin 

Bible Relnak: ⁷“Ka min in kawhmi ka mi hna nih khan an lung an ṭhumh i thla an cam i ka hmai kha an kawl i an lam ṭhalo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai” ( 2 Chanrelnak 7:14)

Biatlangvan

Hi Bible cang (2Chan.7:14) hi Solomon Siangpahrang sinah avoi (2) nak Pathian a langhnak kong a si.  Solomon Siangpahrang nih Biakinn a sak dih hnu ah “Bawipa inn le Siangpahrang inn ” cu a sak hna.  Bawipa sinah pekchanhnak a tuah i Solomon Siangpahrang cu thla a cam ti kha kan hmuh. Cun, caang (13) nak ah ṭihnung ngaimi le ralrin awk an um. “ Van cu ka phih hna i ruahhang an um lo tikah siseh, Khaubawk hna cu vawlei ei awk ah nawl ka pek hna tikah siseh, ka mi hna lakah rai ka tlunter tikah siseh…” tiah aa ṭialmi kan hmuh. Cu harnak le vanchiatnak kan tonnak hnga lo atanglei caang ( 14) ahhin ralrin awk  le thilthup le thil biapi pa (5) hmuh khawh an si i pakhat hnu pakhat in zohṭi hna usih.

1. Ka min in kawhmi kan mi hna

A biathok ah “Ka min in kawhmi ka mi hna ” timi kan hmuh.  A kawhmi hna minung cu ahote dah an si. Pathian nih “ Israel miphun ” hi aa thimmi miphun an si. Jesuh nih thihnak in vailam ah thleidannak le kan sualnak vialte aa thihpi hnu lawnglawngah Judah e, Gentile e, ti um ti loin a mah Pathian fa, a thimmi miphun le a min in kawhmi miphun kan si dih ( Gal. 3:28)…Praise the Lord!.Cucaah, “Ka min in kawhmi ka mi hna ” a ti tikah “ Zumtu ” kan dihlak hi kan rak si.

2. An lung an ṭhumh i

Pathian hi thinlung tlangsang mi hna sinah aa pawlkom khomi Pathian a si lo. Thinlung tlangsangmi hna sinah aa phuan duh lo caah a kalnakding lam cu dingte in rak sial hna u, tiah Prophet Isaiah nih a rak ti (Matt. 3:3). I uahfaih tuk, i uanthlar tuk le mi zeirel lonak thinlung a ngeimi hna sinah aa phuang duh lomi Pathian a si.

3. Thla an cam i

“Thla an cam i” tiah a pathumnak ah kan hmuh. Azungzal  in thlacam hi Bible nih akan fial (2 Thess. 5:17). Thlacam kan timi cu “Pathian sinah kan duhmi kan chim a si”  tiah Andrew Nicolay nih a ti.  Cun, “Thlacam timi cu Pathian he Online ah Chatting kan tuah tikah a biapi bikmi “ Connection” pakhat a si .” Thlacam nun (prayer life) a ngeimi cu an li a leng in an um a har bal lo, an ngeih a chia lo, vawleicung thilri an tlaihchan lo, awlokchong le vansang au in an um bal lo. Zeicahtiah cun, Immanuel Pathian an sinah a um caah a si Praise the Lord!

4. Ka hmai an kawl i

Pathian nih ahohmanh nih ka hmai an ka kawl duh lo, anmah duhnak cio ah an kal tiah, a ti. Phungthlukbia chungah cun, “Aka dawmi cu ka dawt hna i felte in a ka kawlmi nih cun an ka hmuh” a ti (Prov. 8:17). Kannih vialte zong nih Pathian hmai cu kan kawl awk a si. Asinain kawl sawhsawh in kan kawl ahcun kan hmu lai lo. Felte le amah Pathian duhningte in kan kawl  a hau.

5. An lam ṭhalo khan an imer ahcun

Israel miphun cu Sui cawfa an ser i siasal an bia. Kannih zong siasal biami kan si kho ve. Zeicahtiah,  an pumsa duhnak kha an pathian a si a ti (Phil. 3:19). Cucu kan lam ṭhalo an si. Israel miphun zong nih an lam ṭhalo in an imer i Pathian lei an panh tikah Pathian nih a ngaihthiam hna i a fa ah a cohlan ṭhan tawn hna. Kannih zong kan lam ṭhalo in kan imer caan a si cang.

Biatlangkawmnak

Caang (13) nak nih a kan chimhmi “Van cu ka phih hna i ruahhang an um lo tikah siseh, Khaubawk hna cu vawlei ei awk ah nawl ka pek hna tikah siseh, ka mi hna lakah rai ka tlunter tikah siseh …” timi harnak, vanchiatnak, ram miphun zawtnak le siifaknak, thihlohnak le ngeihchiatnak vialte  chung in kan luat khawh nakhnga le kan Ram le kan Miphun a ngan a dam khawh nakhnga “A min in khawhmi kan nih zumtu vialte nih hin “ Kan lung kan  ṭhumh i, Thla kan cam i, Pathian hmai kan kawl i, kan lam ṭhalo khan kan imer ahcun…: Van khin Pathian nih a kan theihpiak lai i kan sualnak a kan ngaihthiam lai i kan Ram zong adamter ko lai.” Kan dihlak caah Bawipa nih thlua kan chuahpiak hram ko seh. Amen!

.............................
Note: Salai Ṭial Hnin cu 2005 ah tanghra a kan aung piak hnu ah 2009 ah Bachelor of Theology (B.Th) a kan dih piak kho. Atu hi Dagon University of Distance Education in Yangon, Myanmar ah English Major a kum hnihnak a kai lio a si i Dr. Ba Oo Preaching Media ah Editor dirhmun in rian aṭuan lio zong a si.