Zisuh ah Thil Tuah/tuan Khawhnak

 “Zisuh ah Thil Tuah/ṭuan khawhnak”

Salai Van Biak Hu

Bible Thimmi: ¹² “Biatak kan chimh hna: Keimah a ka zummi paoh nih ka tuahmi thil hi an tuah khawh ve lai- hi hna nakin a ngan deuhmi hmanh an tuah khawh hna lai, zeica ti ahcun, ka Pa sinah ka kal lai caah a si.” John 14:12

⁸ “Asinain Thiang Thlarau nan cung i a tlun tikah cun, ṭhawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai,”tiah a ti hna. Lamkaltu 1:8

Ahmasa bikah hi bantuk in caanṭha can sungluai a kan petu kan Pathian cu zungzal in thangṭhat si ko seh. Cun VFC ah rianṭuantu le member vialte nan cung zawngah lunglawmh nak tampi ka ngei i Vawngtu khuami nu le pa, u le nau vialte cung zawngah ka lawmhnak kha ka van langhter ve. Zisuh Krih min in nan kut Kan tlai hna.

“Zisuh ah Thil Tuah/ṭuan khawnak”

Zisuh nih Biatak kan chim hna, a ka zumhmi poah nih ka tuahmi thil an tuah khawh ve lai – keimah ka tuah khawh hna nakin a ngan deuhmi an tuah khawh hna lai ati mi bia hi ka ruat tikah khuaruah har ngai asi. Sihmanhselaw kan Bawipa nih a chimmi/ kamhmi bia asi. Atanglei ah fianhternak van zoh hna uh sih.

Pakhatnak: Zumhtu taktak nih Zisuh tuah khawh mi kha an tuah ve. Zisuh nih a tuah khawhmi,  kan tuah khawh ve mi hna cu—Dawtnak le zawnruahnak tibantuk hna hi an si. Dawtmi nu le pa u le uau hna, Zisuh nih a kan duhpiak bikmi cu; pakhat le pakhat kan i daw i, zawn kan iruah hi asi. Baibal chungah; pakhat le pakhat i daw u atitu kha kan Bawipa Zisuh Khrih asi khah!

Asiahcun, cu dawtnak le zawnruahnak cu zeitin dah kan langhter kun lai? Baibal ah kan zoh ahcun (Johan 3: 16), Bawipa nih vawlei a dawttuk hrinhran caah  a fapa ngeihchun kha misual nang le kei kan caah arungthlah i vailam ah thihnak tiang a in ti kan hmuh. Zisuh Pathian fapa thihnak nih Bawipa dawtnak kha a langhter. Phungdang in kan chim ahcun, Bawipa nih a kan dawtnak hi a tuahserh nakin a langhter. Cucaah kan i dawtnak cu kan tuahserhnak in kan langhter ve a hau. Cu tuahserhnak cu; misifak, ngakṭah, le dam lo te hna, bawmh aherh mi hna kan va bawmh hna khi kan tuah/kan ṭuan khawh mi hi asi i dawtnak kan langhternak cu a si.

Atu tiang ahcun, khuami nan dihlak cungah Bawipa hi a lawmh ka zumh. Zeiruangah kan ti ahcun nan thil tuahnak ah asi. Voikhat cu mail ka on i dopawvawngtu biaruahnak ah nan ca ka vun rel hna tikah thawngpang mizaw kong mi pakhat nih avun thlah tikah, bawmhnak tampi he nan leh ṭhan mi hna ka hmuh tikah kai lawm tuk tawn. Ka chim duhmi cu, mi kan bawmh hna cu tangka ahlei in kan ngei ruangah asi lo, dawtnak kan ngei ruangah a si i cu dawtnak cu tuahsernak in kan langhter kha a si. Kan thil tuahkhawnak ah kan i uah ding a um lo, nain Jesuh nawlbia kan zulh caah kan tuahmi tu a si.

Apahnihnak: Zisuh nak hmanh in a ngan deuh mi kha an tuah khawh lai ti mi hi a si. Zisuh vawlei cung ah taksa in a um lio ah khan, khuaruah har thil tampi a tuah. Athih i athawh ṭhan hnu ah khuaruah har thil tuah khawhnak cu zultu hna nunnak kan hmuh. Zisuh nak hmanh in a ngan deuh mi kha an tuah hna...Pentecost ni ah Peter hmangin mi thongthum hrawng nih batisma an hmuh. Lamkaltu 2 chungah kan hmuh i cun a chuah ka in a bei mipa damter khawhnak kha Peter cungah kan hmuh rih. Lamkaltu 5:15- 16 ah Peter a thla nih a tawnh mi hna nih damnak an hmuh. Cun Paul pavuah le hngawngngerh hna hmanh kha mizaw damter tu an si hna.

Sihmanhsehlaw, zultu hna nih an thil tuah khawhnak cu an mah ah asilo i, Zisuh nih a umpi hna nak thong in a si ti kha  fiang tein an i theih. Paul nih cun, “Thawnnak a ka petu Khrih thawngin thil zeipaoh ka tuah khawh ko hna.” ati (Filipi 4: 13). Cun thildang pakhat zultu hna nih an tuah mi cu tehte an sinak hi asi. Lamkaltu chung ṭhiam ah, vawlei cung khuazakip ah ka tehte nan si lai a ti hna bantukin nihin Krihfa a dirhnak hi asi. Zisuh taksia in vawlei ah rian aṭuan lioah a rian ṭuannak ram cu a bite, asinain zultu hna nih vawlei cung khuazakip ah kal in thawngṭha an chim. Zultu THOMAS kha India tiang zong a rak phan a si.

Nihin ni ah ka chim duh mi cu, Zisuh nih a kamh hna bantukin a tuah khomi mizaw damternak kha zulhtu hna zongnih an tuah kho ve taktak i, khuachia zong an thawl kho i, hi hna nakin a ngan deuh mi vawlei cung khuazakip ah Khrih thawngṭha kha an chim.

An thil tuah khawhnak cu an mah asi loh. Zisuh nih Ka Pa sin ah ka kal lai caah ati hna. Pa sin ah Kal a duhnak cu thlarau in an chungah rianṭuan aduh ruang ah asi. Zisuh hi a bia kamh ah zumhthlak in a dir bak mi asi. Mathai 28: 20 ah nan sin ah a zungzal in ka um lai a ti hna. Ka dam chung a ti hna lo i, ka thih hnuah ati fawn hna lo. A ti mi cu azungzal in ati. Zisuh kan sin ah a zungzal in a um ko. Dawtmi nu le pa u le nau hna. Zisuh nih a zultu hna sinah a ti hna bantuk in kan mah zawng a kan ti ve ti hi theih peng hna uh sih.

Voikhat cu thawngṭha chim ding ka si le, ka timhtuah tikah Bawipa sin bomhnak hal loin keimah fimmak/thiamnak in ka vun chim cu… ka phungchim mi keimah hman kha ka ṭah a chuak. Ka chim duhmi cu Zisuh kan i sawm lo le kan mah fim thiamnak/ṭhawnnak kan i bochan ahcun mu kha awng kan tawng hrim lai lo.

Mizo hla phuahtu pakhat nih, “zumtu a ho dah na nunnak lam an hruai tawn… Ahodah na nun nakah a Bawi cem a si?” tiah hla a phuah. Hi hlabia hi kanmah le kanmah i hal hna uh sih! Dawtmi u le nau nu le pa hna kan nunnak lamhruaitu le uktu ah Zisuh hi i sawm ko si. Kan tuah khawhnak le fimthiamnak hna hi Zisuh um pinak tello cun zeihmanh an si lai lo! Kan umnak hmun le ram cio ah Zisuh kan ṭhawnnak, kan thil tuah khawhnak le kan nunnak uktu ah i sawm cio hna uh sihlaw cuticun kan khua kan ram caah thlachuahnak kan si khawh hna lai. BAWIPA nih kan chimthiam mi a um ahcun thlua kan chuah piak hram ko seh. AMEN.

......................

Thawngṭha Chimtu Konglam: Nihin thawngṭha a kan chimtu Salai Van Biak Hu (james.vanbiak@gmail.com ) cu 2010 ah Nichol’s Roy Bible College, Shillong ah Diploma in Theology (Dip.Th) a kan lakpiak i atu hi Bachelor of Theology (B.Th) a donghnak kum a kai lio a si. Salai Van Biak Hu cu Saya Tluang Hnin le Pi. Far Sung hna i an fa le pa 6 hna lakah upabik a si.