Mi Caah Ṭhatnak Tuah Hna Uh Sih

Mi Caah Ṭhatnak Tuah Hna Uh Sih

(Let us do good to all people )

By. Rev. Peng Uk

Baibal relnak: “⁷Nangmah le nanmah kha I hleng hlah uh; a hohmanh nih Pahtian cu a deh kho lo. Mi nih a tuhmi cu a zun ko lai. ⁸A pumsa duhnak lo a a tuh ahcun Thihnak kha a zun lai; Thlarau lo ah a tuh ahcun Thlarau nih zungzal nunnak kha a pek lai. ⁹Cucaah ṭhatnak tuah kha baa hlah u sih; kan ngol loahcun a theitlai kan zun caan kha a phan ve ko lai.” (Galati 6:7-9).

Zei ruangah dah ṭhatnak tuah a herh?

Vawlei cungah nunnak (life) angei mi thingkung/ramkung, Saram(tlang-saram&tii-saram), le Minung vialte hna nih hin ṭhatnak hi lohtheih lo ( compulsory) in kan herh cio mi le kan duh mi a si.

1.      Thingkung/Ramkung

2.      Saram (inn zawt& ramlak)

3.      Minung(people)

Hi pathum nih hin an cungah ṭhatnak tuah a duh lo mi an um lai lo tiah ka ruah, cu caah ṭhatnak tuah hi a herhnak a si. Acung i ka vun tar mi Thingkung le Saram nih an cungah ṭhatnak tuah an duh ve nak kong hi cu ka vun langhter theng ti lai lo. Minung nih kan herhmi tu hi ka vun langhter khawh tawk te ka vun langhter khawh ka van i zuam lai.

Thinlung put a ṭhalomi

Jacob lungput: Jacob hi Esau nau a si, Esau cu ram vaihnak in a rak tlung tikah a paw ṭam lai ding le a ti a hal lai ding kha cu Lai lei ramvaih bal mi nih nan theih fian deuh lai tiah ka ruat, Esau dir hmun hi a foi hrim lo, a har ngai mi a si.

Atu kan khua tlanglei (khuarawh)Sianginn ah Tangcheu ka kai lio  ah ka nu nih thilthan kha zal ah a 
 ka ṭhit piak i a chungah khuahrang cafung a ṭha mi te le calung cu a vun ka sanh piak i Sianginn cu ka kai. Chunchuak ah ka hoi le he ball cu kan chui, lut ṭhannak ding bell tum thawng cu kan theih tikah ballon kan chui mi cu kan ngol. Kan ti a hal, kan paw a ṭam tuk i RiaRia nih tii a ngei i ka khat ding man ah  ka calung le ka cafung  ka rak pek.

Esau cu a nau Jacob sin ah ruah channak nganpi he rawl a hal tikah Jacob nih a lak te in a pe siang lo. Cuticun Esau nih anau Jacob sinah rawl voikhat einak in upadeuh a si nak cu anau Jacob nih a cawk. (Gen 25: 31). Mah chuahpi mi a U cungah zaangfah nak a ngeih lomi kha a thinlung put a hmanlo caah si. A nun chungah herh baunak nih a hngak peng ko. Phungthluakbia 11:24, “Mi pakhat nih siangte in a thenh lengmang i a rum chin, a dang pakhat nih tinsih in a um I herhbaunak lawng kha aa miak ko”. tiah kan hmuh. 

Iran lungput: Monday, 11 February 2013 18:01  ni ah Iran nih athawh i;  Israel nih hin a duhning poah in aram runvennak cu tuah ko hmanh seh law Muslim kut in a rawk ṭhiamṭhiam ko lai tiah Iran Parliament ah chungtel a simi pakhat nih hi ti in a chim. An thinglungput hi a hman ti lo, Israel cung ahhin ṭhatnak tuah hi Iran caah cun thilrit ngai a si.

Kan kawlram lungput: Letpadaung ah Tuluk Darsen rianṭuannak Wanbao Company nih pawngkam khuate 26 nunnak le ngandamnak ṭih a nunter ruangah a luancia thla ah duhlonak a langhtermi hna kha kawl police pawl nih chemical meithal in an rak kah hna i mi tampi hma le zun he sii inn tiang an phan. Sipuazi an duhtuk ruangah mah mi nung hmanh a dawt khawh ti lo.

Absalom lungput: Kan ram chungah hin keimah hi biaceihtu hei si ning law tiah a thinlung lungput ṭhalo  a ngei cangka in a mah a hrintu a Pa lila kha ralchan in khua a khangpeng cang. (2Samuel 15 : 3). A pa ṭhutnak ṭhutden kha chuh a duh cang i a pa David kha thah ai zuam, a donghnak ah a mah tu kha a nunnak a dih ko. (2Samuel18:9).

Thinlungput a ṭhami

Abraham nun: Abraham cu fa ngei kholo in lungre thei ngai in thlam innka ah a thut lioah khan khua a hei zoh i, mipa pathum an dir kha a hmuh hna. A hmuh hna le cangka a va tli i a va don hna. A khup aa bil i, “Bawipa, ka inn ah tangta loin kei santlailo pa hi ka lanhtak sawh hlah. Tii in cahpiak hna ning law  nan ke i ṭawl u law thing toi ah hin i din ta u. Rawl tlawmpal tein in serpiak hna ning law ei ta u law cun nan bat a dam in nan lan te lai. Ka inn nan rak phan cang tung i, rawl ei ta lo cu ka sia a herh,” a ti hna( Gen.18:1-5).

Abraham nih khual cungah thilṭha a tuah ruangah Pathian thluachuahnak kha an pek i nuphung hmanh a thei tilomi tarnu Sarah nih fa a pawi i fapa Isak a hrin.( Gen.21:1-7).

Hi tuanbia nih a kan cawnpiakmi cu Pathian min in zei thil poah midang cungah ṭhatnak kan tuahmi nihhin Pathian nih kan caah kan herhning in a thluachuah hi a kan pek peng ko ti hi zumtu mi hna nih kan philh lo awk a si.

Zerefath nuhmeinu nun: Zarenfath nuhmei nu hi sifak tukmi a sinak cu an ei awkah changvut pei khat lawng  a ngei i, thawl chungah chiti tlawmte lawng lawng a ngei pinah rawl chunnak ah thinghreu pahnih thumte lawng an ngei. Nuhmei nu nihcun, kan ei dih ahcun kan thi ko lai titiang in profet Elijah  sinah a rak chim. Sihmanhsehlaw cu hnuhmei nu nih a ngeihmi te cu a fapa he ei sianglo tein Pathian rianṭuantu a simi Elijah cu zaangramnak pel poi te hmanh ngei lo in a pek dih ko. (I  Siangpahrang 17 : 8;16).

Cu nu hmeinu lungput aa dawh ning cu, mi dang cungah ṭhatnak a va tuahnak thawngin an chiti um le an changreu cu dong cat loin an inn chungkhar ah a luangpeng ko.

Bill Gate le anu pi Melinda nun: An mah nu pa hna hi Washington ah inn $.150 million man a ngei mi an si. An chim mi cu Tangka hi a hleihluat tiang in ngei a herhnak a um ti loh. Vawlei cungah a sik a fakbik mi hna va bawmh chantu hi san a tlai bik an ti.

Mi tampi cu kan harnak konglawng kan ruahnak nih hin hmailei thluachuah a kan phih tawn. Pathian nih zeidah siter a kan duh timi tu a zoh hmasami hna nun ah a dong catlomi thluachuahnak a tlung i, zungzal in a dong tilo mi thluachuahnak an co zungzal.

Ṭhatnak  tuah khawhnak ding caah cun chunglei thinglung ruahnak a dirhmun a ṭhat hmasa a herh. Lungput a ṭhat ahcun lenglei Action colhcanghnak zong a ṭha. Cucaah chunglei kan lungput hi a biapi tuk.

Thlacamnak:

Ṭhawngnak he a khatmi kan biak Pathian, midang caah ṭhatnak nifa a tuah khomi kan si lo hmanh ah ṭhat lonak  kan lakah tuahtu kan sinak hnga lo na ṭhawngnak in kan bawm law, na fimnak in nifa kan nun ram rak kan hruai ko. Amen.

………………………………

Thawngṭha Chimtu Konglam:

Kum 17 renglo Pathian rian a ṭuan cangmi Rev. Peng Uk (Bawi Tin Hnem pa) arianṭuannak tuanbia tawi cu atanglei bantuk in ka van langhter:

·        1990- 1994 (March 20) ah Marantha Bible College, in B.Th a kan dihpiak

·        1995-1998 (Kum thum chung)Vawngtu AG Church ah Pastor a ṭuan

·        1998-2000 Kum ah Hakha Section ah Evanglist a ṭuan

·        2001-2002 Kum ah Thanṭlang Section ah Evangelist a ṭuan ṭhan

·        2002-2004 Vawngtu ah Pastor a ṭuan ṭhan.

·        2005-2006 tiang Zaabung Khua ah Church Pastor a ṭuan

·        2007-2009 tiang Hakha Section ah Evangelist a ṭuan ṭhan.

·        2009-2012 tiang Chin Christian Fellowship, New Delhi ah Pastor a ṭuan.

Rev. Peng Uk cu Indian Theological Seminary, Chennai, India ah M.Div a kum hnihnak a kai lio a si. Bawi Tin Hnem pa, le nu, (Pi. Rem Ci) hna cu Pathian nih fanu pahnih le fapa pakhat thlua a chuah hna.