Nun Chung Khawmhnak

Tlangtar: NUN CHUNG KHAMHNAK

Mai Dar Hlei Par

Bible Thimmi: “⁸ Zakia cu a dir i Bawipa, “Bawipa, ngaihmanh, misifak caah ka ngeihmi thil hnarcheu ka pek lai; cun ka hlenmi hna an um ahcun a let li in ka cham hna lai,” tiah a si. ⁹ Jesuh nih a thawh i, “Nihin ah hi inn ah khamhnak a phan; hi pa zong hi Abraham tefa a si ve. ¹⁰ Zeicahtiah Mi Fapa cu a tlaumi kawl awk le khamh awkah a ra,” tiah a ti. (Luke: 19:8-10).

Nihin ka tlangtar he pehtlai in a biapi in iruahṭi hna uh sih tiah ka duhmi cu “Nihin ah hi inn ah khamhnak a phan” ti hi a si lai. Kan theih cio cang mi asi ko lai nain a thar in nolh ṭhan ka duh mi cu Zakia tuanbia hi asi. Zakia tuanbia kan zohṭhan tikah Zakia cu Jerico khua ah Ngun Khuai Khawl vialte lakah a nganbik mi pa pakhat a rak si. Cun a rian ṭuanning kan zoh ahcun amah hi Rome Cozah nih ram le miphun caah ṭuanvo a pek ve mi pakhat a rak si. Asinain a ṭuanbia kan zoh ṭhan tikah mipi nih huat taktak mipa asi. An huatnak a ruang cu Rome Cozah nih Ngun Khuai Khawlhnak he pehtlaih in rikhiah mi a ngei. Hi zawn ahhin cu zat in na khawlh hna lai i kha zawn ah khan kha zat in na lak hna lai ti bantuk in ri khiah piak mi a rak um. Sihmanhsehlaw, Zakia nih Ngun Khuai a Khawlh tikah Rome Cozah nih a zat a khiah piak mi nakin tamdeuh in a khawlh tawn hna. Cubantuk a tuahsernak nih Zakia hi huat a hlawhter ti kha a tuanbia ah kan hmuh khawh.

Ngeihchia chawva mit in kan zoh a si ahcun, a phaisa hmuh mi ruangah amah le chungkhar hna cu mirum an si lai ti cu a fiang i eidin ti le rawl, hruk eih hnipuan kong ahcun a tlam a tling lai. Sihmanhsehlaw, cubantuk a tuahsermi ruangah khan Zakia chaw le va cu fir mi le a thiang lo mi thil an si dih. Biaknak mit in kan zoh ṭhan tikah Zakia cu a tuahsermi ruangah biaknak mit in misual le mi dinglo ah hmuh asi cang. Mah caah cun biakinn hmah a panh ngam lai lo. Cupinah, 'pawngkam peitlaihnak', mit in zoh tikah Puai heiti bantuk, ni sunglawi deuh hmanh ah a chuak ngam ve hnga maw dek. Aruang cu mi zapi nih miṭha lo tiah theihmi asi tikah a caah mitthmai ṭha hi hmuh a har ko lai.

Uknak leiin kan zoh tikah le Zakia ruangah Rome cozah pi tiang kha mipi nih an huat can zong a um lai. Tangka cu hmu liangluang in ngei liangluang ko hmanhsehlaw, a caah daihnak petu an si kho lo. A hmuh lio ahcun i nuam ngai ko hmanhsehlaw cubantuk nuamnak nihcun lawmnak le daihnak taktak a phak pi kho lo. Ahman lomi tuahsernak nih a chuahpi mi nuamnak cu lawmhnak le daihnak nih an zulh tawn lo. Cucaah Zakia hi aa nuam bal lai lo ti cu a fiang ko. Cupinah, cu bantuk a tuahsernak nih khan amah lawng harnak a pe maw kan ti tikah, amah lawng siloin a sahlawh rualchan a mah pumpak chungkhar le chungkhat tiang nih an tuar ve lai ti cu aa fiang mi a si.

Sihmanhsehlaw, Bawi Jeush cu a inn ah a rak tlun tikah cu vialte a thilrit cu a ṭhumhpiak dih i Zakia cu lawmhnak in a khat. Cutikah a rak hlen mi hna zong a letli in cham a timh ṭhan. A tawinak in kan chim ahcun thilṭha lo kha tuah aa timhti lo. Bawi Jesuh nih a thinlung kha a hmuh tikah 'Nihin ah hin inn ah khamhnak a phan” tiah a rak ti. Aruang cu a tuahmi thilṭha lo kha Bawi Jesuh thawngin a hlawt tikah Zakia cu huatnak le zawmhtaihnak in a luat i amah lawng siloin a mah ruangah a rak tuar ve mi hna zong kha an tuar ti lai lo caah Bawi Jesuh nih 'Nihin ah hi inn ah khamhnak a phan' tiah a rak tinak cu a si. Cu nih a langhter mi cu Van Ram le Hell Ram timi hna hi thih hnu lawng lawng ah ton ding khi a lo ngai nain kan nunchung zongah rak ton chung khawh mi a rak si zia kha a langhter fawn.  Kannih zong Zakia tluk in kan va suallo hmanh ah kan mah le tuahsermi ruangah pumpak in hremtu Hell kan ngei cio kho men hna. Cucu Hell a si ve ko ti kha chim ka duh. Cun can tampi ahcun, kanmah tein kan sualrua, kanmah chungkhar lawng kan palh rua, kanmah lawng kan thang a chia rua tiah kan i ruah lio zongah, kan chungkhar, Khrihfabu, Khua le Ram le Miphun pi caah ning zahnak  le fahnak hna arak si. Cun, kan theihding mi cu kan mah pumpak lawng nih kan tuar zongah kanmah le kanmah kha Hell ah kan i kuat a si i, cuve bantuk cun mi caah harnak kan tuah zong kha mi dang kha Hell ah vakuat khi asi ko.

Khrih ah dawtmi, U le Nau, Nu le Pa hna kannih teh Jesuh nih Zakia a roh tak mi khamhnak chung ah kan um ve a herh ko. Zakia le a chungkhar bantukin nunchung Hell ram ah kan leng hna maw? Kan khua le kan ram, kan miphun le Khrihfabu le kan chungkhar teh khamh a si cang maw. Khamh kan si rih lo ahcun Bawi Jesuh don i thawh ve cang hna u si. Zakia cu Bawi Jesuh donnak ding caah dawntu thil tampi a ngei, a tuah sernak zong nih a donh i a tungkhan pum rua zong nih a donh. Asinain, a pah chih i a va don tikah Bawi Jesuh nih nun chung Hell ram in a chuah i nun chung Van Ram ah a ṭhial ṭhan. Bawi Jesuh i Vawlei ah a rat hnawh channak hi thih hnu thawh ṭhan tik kan thlarau ca lawng a rak tinh lo i Vawlei kan nun chung hrimhrim ahhin Vawlei lei in khamh a kan timh. Bawi Jesuh donnak ding caah dawntu thil tampi a um ko lai, pah chih ve hna u si law don cu i thawh ve phot ko hna u si. Bawi Jesuh cu kan don ahcun kawh hau lo in a kan tlung ve lai i Zakia a rak roh takmi khamhnak cu a kan roh tak ve lai. Cutikah kan mah lawng siloin  Chungkhar, Cingla Rualchan, Khrihfabu, Khua le Ram le kan Miphun pi nih, cu khamhnak thawng in daihnak le hnangamnak a hmuh ko lai. Bawipa nih thluachuah kan pek piak ko seh. Amen

Thawngtha chimtu: Mai Dar Hlei Par (darhleipar@gmail.com) cu Rev. Ca Kung le Pi. Ni Chin i afa upatbik a si i atu hi Mandalay ah a um mi Myanmar Theological College (M.T.C.) ah L.Th a kum hnihnak a kai lio a si.