Bawipa Lam Kha Remh Hna Uh Sih

ZARHTENI CAANHMANNAK

Saturday, October 20, 2012

Visit VFC at www.vawngtuforchrist.blogspot.in

Caantlaitu                  :           Salai Tum Za Sang (Chennai, India)

Thawngṭha Chimtu    :           Rev. Peng Uk (Chennai, India)

Thlacam kan cam hna lai:

Hallelujah, Bawipa dawt  awkthlak lo kanmah Vawngtu tefa zong kan umnak kipah nan kan zohkhenh ii nan kan kilven zungzal caah na min kan in thangṭhat ii na pennak kau chin ko seh,Bawipa a tu caan ah na sal pa Rev.Peng uk hmangin na bia kan theih lai mi zong hi nangmah nih thawngtthachimtu a hmurka a leidang zawng thluachuah tthan ko tiah kan caan kan nunnak le kan   zeizong vialte na kutchungah kan in chanh,  khamhtu Jesuh min in thla ka  cam kan Pa Pathian.Amen.

Thawngṭhachimtu tuanbia tawi:

Kum 17 renglo Pathian rian a tuan cangmi Rev. Peng Uk (Bawi Tin Hnem pa) ariantuannak tuanbia tawi cu atanglei bantuk in ka van langhter:

·         1990- 1994 (March 20) ah Marantha Bible College, in B.Th a kan dihpiak

·         1995-1998 (Kum thum chung)Vawngtu AG Church ah Pastor a ṭuan

·         1998-2000 Kum ah Hakha Section ah Evanglist a ṭuan

·         2001-2002 Kum ah Thanṭlang Section ah Evangelist a ṭuan ṭhan

·         2002-2004 Vawngtu ah Pastor a ṭuan ṭhan.

·         2005-2006 tiang Zaabung Khua ah Church Pastor a ṭuan

·         2007-2009 tiang Hakha Section ah Evangelist a ṭuan ṭhan.

·         2009-2012 tiang Chin Christian Fellowship, New Delhi ah Pastor a ṭuan.

Rev. Peng Uk cu Indian Theological Seminary, Chennai, India ah M.Div a kum hnihnak a kai lio a si. Bawi Tin Hnem pa, le nu, (Pi. Rem Ci) hna cu Pathian nih fanu pahnih le fapa pakhat thlua a chuah hna.

THAWNGṬHA CHIMNAK:

Tlangtar:  “Bawipa Lam Kha Remh Hna uh Sih”

Rev. Peng Uk

Bible Cang : Luke 3 : 4 – 6 4“…Mizeimaw cu ramcar chung khan  au i, ‘Bawipa lam kha rak remh  u. …5Akuarnak hmun vialte kha rak chilh hna u law, Tlangsang le fing bo kip kha rak rawnter hna u; Lam aa ngerhmi kha rak dinter hna u, lam bingbo vial te kha rak tlornalh hna u;6Cun minung phun paohpaoh nih Pathian khamhnak kha an hmuh lai...”

1.Tlangsang kha chilh hna u; Tlangsang tiah kan Bible nih a timi cu kan thinlung tlang hi a si. Kan Bawipa Jesuh Khrih kha sunparnak in Jerusalem lei a lut lio ah khan, Oliv Tlangin chuk i a vung zuannak ah khan a zultu mibu nganpi nih cun, an hmuhmi thil lianngan vialte ruangah khan Pathian cu an lawmh i ‘aw’ fak piin an thangṭhat .Luke 19 : 37.

Sunparnak a va hmuh hlan deuh te ah khan Olive tlang a sangnak in a niamnak hmun Jerusalem khua lei tu kha chuk a va zuan hnu longah khan mizapi nih aw fak piin an thangṭhat. Mipi sinah thangṭhat le sunpar hmuh kan duh ve ahcun Olive tlang bantuk in  a sangmi kan thinlung tlangsannak te kha chilh hmasa hna uh sih. Kan lungthin tlang tete hna hi niamter hna uh sih”. Balaam a chitmi a laa nih khan a bawipa Balaam kha a cawnpiak” Laa nih a Balaam kha “Na cungah zeidah ka tuah i voi thum tiang na ka tuk? tiah a ti. Balaam nih cun a mah a thattu ding vancungmi kha a hmuh lo i a laa nih khan a hmuh piak i a cawnpiak. Tang i a ummi nih cunglei mi kha a cawnpiak. Number 22: 21- 37/.Naaman ral bawipa kha a sal nu” hngakchianute nih khan a cawnpiak ve kha! Ral bawipa a thinghmui zawtnak kha hngakchianute nih a hmuh piak ve i “Samaria ram i a ummi profeh sinah ka bawipa hi va kal seh law ka hei duh dah”.2king 5 : 1-14.

Kan thinlung tlang sang tiduhmi cu lungthli te in mizei rel lo nak hna hi kan chilh hna lo ahcun mi nih kan cungah Bawipa lianngannak hi an hmuh kho lai lo.

2. A kuarnak  hmun ( Santlailo): A kuarnak hmun tiah a ti duhnak cu kan thinlung put kan i chuahpimi hrim hi kan mah laimi cu santlai lo  tiah kan thinlungput hi thlenghna uh sih.A khuk a thermi cu thazang pe hna u; tiah a ti. Isai 35 : 3.Santhlailo val /nu chuahchan ngeihlo, tiah hla kan sa kan kaa in kan phuang tawn mi hi chimti hna hlah uh sih. A chia deuhmi paoh hi lai tuah/ser. Bawipa thawngin zeizong vialte tuah kho kan si timi lungput ngeih hna uh sih. Leidip lak le hmunthur lakah a kan cuaisantu cu Pathian a si. Ka thiam lo, ka si kho bal lai loh timi kan’lungput kha hloh cang hna usih.. Amarican Tamadah hlun (Former President) Abraham Lincone kha sifak dirhmun in rampi hruaitu ah a cuai sangtu zong kha kan biak kan Pathian a si. Joshep zongkha a u le hna nih horkuangchung an thlak hnu longah rawl uktu bawipa ah Pathian nih a cuaisang ko.

Kanmah Vawngtuu tefa hna ,Santlai lo  chuahchan ngeih lo , kan thiam lo ,kan si kho bal lai lo tiah kan i ti tonmi hna kha  ‘Bawipa min in a si kho’ ti cang hna u sih.

3.Aa ngerhmi lam (lungthin ziaza): Thinglung hi zeizong vialte nakin a zerh bik. Jer 17 : 9.Aa ngerh cangmi laa/lam/thingkung/thinghram hna hi a lam zawh le a kai an tuahto a har ning hi nan i fiang ko lai. Committee /groups, khrifabuu pakhat khat ah maw meeting kan tuah nakah agenda pakhat a ṭhami te a vun chuah tikah a rumro in thlak a duhmi kan um theu tawn. Keimah ka duhnak longin biatluseh tiah a ruah mi le midang bia ngaiduh lonak ziaza,a nuar hmangmi zia, pa zong kan ngeih i nu buu ahhin a tam deuh cu a si tawn. Aa ngerhmi nun ziahi a zulh a har ngai.

Biafunnak: Kan thinlungte ah kan i auhnak le keimah timi tlangfa te kha chilh uh sih law rawn ah ser hna u sih. Aa kuarnak kan i niamternak santlailo kan tinak hmunte ah khan kan Bawipa thawngin ka si kho. Midang an si ning kha a tthatnak lei ah ruahpiak thiam in thazaang pek thiamnak kha ngeih hna u sih.Cutincun Bawipa a kalnak lam kha remh hna u sih law, Miphun vialte nih Pathian khamhnak le sunparnak kha an hmuh lai.Amen

Donghnak thla kan cam hna lai,

Bawipa a hramthawk in a lai dongh tiang na thlarau thianghlim in nan kan um pi caah kan i lawmhtuk, maw Bawipa na salpa hmangin na bia na kan theihter mi zawng hi kanmah Vawngtu tefa a si mi nih nifatin kan nunak ah a nun pi kho i a zulh kho pengtu kan si nakhnga thluachuah kan pekpiak ko tiah khamhtu Jesuh min in thla ka cam kan pa Pathian. Amen

Thawngṭha chimtu contact number: Mobile:- 9940530728