Miphun Vialte hna Lakah Cuaisang in um khawhnak ding Thluachuah Lam

ZARHTENI CAANHMANNAK

Saturday, October 13, 2012

Visit VFC at www.vawngtuforchrist.blogspot.in

Caantlaitu                      :              Mai Dar Hlei Par (Mandalay, Myanmar)

Thawngthachimtu   :              Saya Ral Hmung (Mandalay, Myanmar)

Bible Relnak le Thlacamnak he kan caanthawk hna usih

Caantlaitu Bible Relnak: “Ka u le ka nau hna, kan Bawipa Jesuh Khrih min in kan nawl hna: nan dihlak in pakhat le pakhat lungnge tein um tuah u, i then hlah u. Lungthin khat ruahnak khat in um u” (1 Korin 1:10).

Hramthawk Thlacamnak: Nifatin kan nunnak ah lam a kan hruaitu kan Pathian, na minthiang thangthat sikoseh, Bawipa na fa le zong, khuaza ramkip, kan umnak cio ah na kan umpi  i atu bantukin na biathiang i hrawmttinak  caanttha na ka pek caah na min kan in thangthat ko. Bawipa, na fapa nih  na bia a auhpi mi hi  na fa le  kan dihlak caah thazangthar a kan petu le  hmailei kan nunnak ah lamttha a kan hmuhsaktu a si khawh nakhnga nangmah nih thluachuahnak kan pepiak hram ko, tiah ka nunnak, kan caan le kan zeizong vialte na kutcung chanh buin kan Bawipa Jesuh Khrih min in thla kan cam, Kan Pa Pathian. Amen.

Thawngtha Chimtu Tuanbia Tawi: Saya Ral Hmung cu Pathian ram kauhnak caah a nunnak pekin nihinni tiangah zumtlak in a dirkho mi kan pa pakhat a si. A mah cu  1992-1996 Maranatha Bible College ah  B.Th a kan  dihpiak, 1996 in 1998 tiang Evangelist atuan, 1999 in 2000 tiang Vawngtu ah A.G. Church Pastor a tuan, 2001 in 2003 tiang Evangelist a tuan tthan, 2004 kumah Missionary training a kai i 2005 in nihinni tiang Missionary in Mandalay ah aum lio a si.

THAWNGTHA CHIMNAK

Miphun Vialte Hna Lakah Cuaisang in um Khawhnak ding Thluachuah Lam

By: Saya Ral Hmung

Biahmaitti: Ahmasabik ah hi bantukin caantha petu Pathian a min thangtha koseh. Hi bantuk in khua a khan i lai a reltu upa nan cung le khua mi dihlak nan cungah  kaa lawm tuk hrinhrang, Pathian nih thluachuah  inpe chin lengmang ko hna seh. Cun  ka dawtmi kan khuami dihlak, ramchung  ramleng ummi nan dihlak,  kan Boikhrih min in nan kut kan tlaih hna .Kan Pa Pathian dawtnak, Kan Boipa Jesuh thatnak le Thiangthlarau umpinak cu kan dihlak cung cio ah tlung ko seh. Amen

Miphun Vialte Hna Lakah Cuaisang in um Khawhnak ding Thluachuah Lam

Biahrampi: Pathian chimmi bia ningtein nun le zulh hi vawlei cungah thanchonak  le rengkainak (promotion) hmunhnak dingah a tthabikmi lam asi  zia, vun langhter ka duh. Vawleicung minung vialte nih thancho le rengkai le hlawhtlin in a um mi si kan duh dih hna .Cucu a kan sertu Pathian nih minung caah a rak kan tintuahpiakmi lam a rak si caah a si. Cucaah minung a simi poh nih thancho le hlawhtlin in um kan duh dihnak a si. Deut 28:1-13 kan rel tikah  Pathian nih a mah bia a ngai mi pawl  hna cungah tlunter ding a timh mi  pawl kan zoh tikah chaw le va, cun neih le chiah ah hoidang nakin ngeihdeuh le rumdeuh a kan duhzia kan hmuh. Cucaah kan nih Vawngtu tefa hna nih  Deutronomy chung i Pathian biakam vialte hi kan tinco khawh ve nak lai tiin hi thawngtha hi ka van i thimnak asi.

1. Pathian nih anawl azulmi hna cungah tlunter a tinhmi thluachuah 

Pathian chimmi nawlbia bang nan nun ahcun;

1. Vawlei cung miphun vialte cungah kan chiah hna lai

2. Khuapi nan um ah siseh khuate nan um ah siseh mi nak sangin thluachuah kan pe hna lai

3. Nan pum theitlai ah(pumtheitlai cu fanu/pa thatha tehna, le mui le sam i dawh te hna le aw le zai that tehna thluachuah khi a chim duh mi a si.)

4. Nan vawlei theitlai ah( vawlei theitlai cu  ei le din awkah a kan pekmi; thingthei le facang, ka-awm phun le baa phun le vawlei tang chuakmi lungvar mansung vialte pawl khi a chim duhmi a si)

5. Nan bawm lechangreu tuahnakah (eidin ah hoinak thain eiter a kan duh , job36:16 ;1kng4:22-24 ah kan hmuh).

Mah thluachuahnak hna hi amah Pathian bia a ngai mi pawl nih tinco dingah Pathian nih bia a kam mi asi.

Rom 3:12 ah Pathian bia ningin a nun kho mi miding  mifel a ho hmanh an um lo ati bangin nang le kei nih Pathian bia bangin nun khawh ding cu hartuk dingin kan rak ruah ton ,a si nain bomtu Thiang Thlarau thongin awl tein  Pathian phunglam ningin nun khawh zulhkhawh kan si .

2. Pathian phungbia ningin zulhkhawhnak lam (Ezk36:25-36)

Cang 25;Tithiang kan theh hna lai i nan nih an thurhnawmtertu thil vialte khan kan tthenh dih hna lai; nan sialsal biaknak thurhnawmnak vialte khan kan tthen dih hna lai ati. Sialsal  cu Pathian nakin ‘u sa’ kan pek deuhmi poh khi an si (Filipi3:19).Mark7:21 ah kan Bawipa Jesuh nih minung a thurhnawmtertu cu kan chung i a um mi sualphung khi a si tiin a kan chim. A suallam cu chunglei sualci tawlnak dingah Pathian nih a Thiangthlarau  a kan pek. Raifen zawtnak cu raifanh sii long nih a dam khawh bantuk in na sualci tawlpiak dingah le thahpiak dihkhotu dingah cun Pathian nih a Thiangthlarau a kan pek ve. Rom8:13 ah na mihring si ning a nun ahcun na thi lai i sualnak na tuahmi kha Thiangthlarau in na thah ah cun na nun lai ati.

C 27; Ka thlarau cu nan chungah ka khumh lai i ka nawlbia he a tlak in an nunter hna lai i ka phunglam zulh in nan nung lai ati. Pathian nawlbia he a tlakin nunterkhotu cu Pathian Thiangthlarau long a si. Bible sianginn kai i degree tampi lakzongah kan chunglei nunzia kan thianter kho hlei lo, Bible ca tampi in rel i Bible ca tampi hngalh nakzong nih kan zia kan rem kho hlei lo, thla tampi  in cam len le rawl ulh thlacamnak  zong khi kan chunglei ziaza remh hnga tluk in kan i remh khawh hlei lo zia kaa fiang cang. Kan chunglei ziaza i remnak ding ahcun nifatin in Thiangthlarau sawm peng hi a si ko.

Nangmah zong,  Bawipa Pathian ka nunnak hi  nangmah kan pek,  ka thinlung le ka ruahnak a thalomi vialte hi nangmah nih kan thenhpiak ko; tiin lungthintak tein nifatin in sawm hmanh,  na nunnak le na thinlung le na ruahning a vun thleng ning kha nangmah nih na theih te ko lai. 2cor 5:17; Mi a hohmanh Khrih chung a um ahcun  a nunnak cu  a thar in ser a si cang i thilhlun vialte kha an lo dihcang i zeizong vialte an thar dih cang , cu ti i asi cu Pathian thlarau thawmgnak thong in a si a ti.( Kawl Bible)

Ezk 36: 29-36 Hihi na rel ahcun, nan kum ka vuiter lai i rawl tampi in kan pek hna lai i ramdang mi hmaiah, sifah ruangah ningzah le hmaichia in kan umter ti hna lo tiah Pathian nih a timi pawl na hmuh hna lai. A chim duhmi cu nan rian tuannak ah thluachuah kan pek hna lai i hlawh tampi nan hmuh lai  i ramdang mi hna lakah hmaibi in nan um lai lo ti he a lo ko.

Biadonghnak: Vawleicung  khuaza ramkip i a um, ka khua ka ram mi hna,  rian na tuan pah ah siseh  lam na kalpah le motor na mongh pah ah siseh; Maw Boipa  na Thiangthlarau in ka nunnak  hi ka uk law ka thinlung le ka ruahnak vialte hi nangmah duh bangin ka sersiam law  vawlei caantuaite ka nunnak hi na sunparnak caah ka hmang ve ko tiin tihal le rawltam tein thlaza campeng u sih ti kan sawm hna. Nan dihlak cungah Pathian thlauchuah tlung ko seh .

Thlakan kan cam lai,

Vancungkhua i a ummi kan Pa na min upatnak um ko seh .Na mi Israel mi hna sinah ka nawlbia nan zulh ahcun  vawleicung miphun vialte cungah kan  chiah hna lai tiin bia na kamhmi hna thlauchuah kha kan  nih Vawngtu tefa dihlak kan cungah tlunter ve ko cang tiin kan Boipa Jesuh Khrih min in zangfah kan nawl kan Pa, Pathian . Amen.