Na Ruahning Bantukin Asilo Zongah

ZARHTENI CAANHMANNAK

(Avoilinak)

Saturday, October 6, 2012

Visit VFC at www.vawngtuforchrist.blogspot.in

Caantlaitu                    :   Salai Ni Bik Thang (Hyderabad, India)

Thawngthachimtu   :  Pastor. Peng Ling (Melbourne, Australia)

Bible Thiang relnak he kan can thawk hna uh sih: “Miphun hna sinah a sunparnak kha nifate in thanh u, mi vialte kha thil lianngan a tuahmi cu chim hna u”(Psalm 96:3).

Hramthawk Thlacamnak: Hallelujah, nihin ni tiang lam a kan hruaitu kan biakmi kan Pathian na min thangtthat si ko seh.  Maw Bawipa, na fa le,  khuaza-ramkip um, kan nih vialte zong na biathiang he thazang-thawngnak na kan pe than lai caah na min sunglawi cu thangthat si ko seh. Maw Bawipa, na fapa nih na Thawngtha a aupi mi hi kan nih vialte kan caah nangmah ah thazangthar a kan pektu le nangmah lei kar kan hlannak ah lamtha a kan siampiaktu ah canter hram ko tiah, kan caan le kan zeizong vialte na kutcung chanh buin kan Bawipa Jesuh Khrih min in Thla kan cam kan Pathian. Amen.

Thawngthachimtu Tuanbia tawi: Pastor Peng Ling cu Melbourne, Australia ah Adult Multicultural Education Service (AMES) timi organization ah ‘Case Manager’ dirhmun in a tuan liomi a si. 1999, Chin Christian College (CCC), Hakha ah B.Th Degree; 2004, Myanmar Institute of Theology (MIT), Insein, Yangon in M.Div degree; le 2006, Australia Whitely College ah Post Graduate Dip in a kan dih piak. Anih hi 2000 in 2001 tiang, Vawngtu khua Baptist Church ah Church Pastor in a rak tuanbelmi zong a si.

Thawngthachimnak

Tlangtar: NA RUAHNING BANTUKIN ASI LO ZONGAH…

Pastor Peng Ling

Biahmaitthi: Ahmsa bikah hibantukin caanttha a kan petu Pathian min kan thangtthat i, Ramkip um dopaw Vawngtu fanau vialte Bawi Khrih min in nan kut kan tlaih hna. Pathian daihnak nan cungah um cio ko seh. Hibantuk in thawngttha chimnak ah rianttuantu upa hna nih caan an ka pek caah an cungah lunglawmhnak tampi ka ngei. Nihin thawngttha cu “kan ruah ningin thil hi a kal ton lo”. Asi ahcun zeitindah kan tuah kun lai timi i ruat tuah hna u sih.

NA RUAHNING BANTUKIN ASI LO ZONGAH

USA Dolestown khuate  minung 3000 tluk umnak ah Valerie Spruill an timi nu cu a ruahning lo piin thil an innchungkhar ah a cang. Mah cucu a dawt tukmi a va pa kong a si. Valerie Spruill nih a vapa cu va ttha te a si, innchungkhar nuam kan rak si, a ti ko bu ah a duh lo tukmi thil ngaihchih len zongah san a tlai ti lomi a va pa sining taktak kha a pu nih a chimh hnu ah a theih. A dawt tukmi  a vapa Percy Spruill cu amah a hringtu a pa lila a rak si kha a pu nih a chimh. Cu hnu 2004 ah DNA test an tuah taktak tikahcun a vapa cu amah a hringtu pa a si taktak kha  a theih. Valerie Spruill cu a luancia mi kum 8 chung aho sin hmanhah a chim lo. Nai Sept 20 ah Akron Beacon Journal nih biahalnak an tuahnak ah a chim tiah news a relmi nih cun nan rak theih ko lai. Valerie nih a tonmi thil thengmang kan tawng lo nain kan ruah lo ning piin thil a cangmi, kan tonmi  a um cio ko. Cucu a hmanmi a si.

Kan innchungkhar kong ka ruah fatin kan lung a fak. Ka nu le ka pa cu an tar hnu ah an i tthen. Australia ka phanh hi ka ruah ning bantukin  thil a si lo zia. Innchungkhar nuam tein kan um lai. A silo. Na pa nupi a ngei ti tu a si ai. Ka zum kho lo.  Asinain ahmanmi a si. Nain a tu cu ka pa sual ka phaw lo. Mah hi vawlei cungah a um cangmi thil a si.

Nihin ram thumnak (US, AU, Denmark, Norway, New Zealand, Canada) a phan cangmi hna vawlei cungah ram ttha deuh um rih sehlaw kal na duh rih lai maw? na phannak ram na ruah ningin bantuk a si maw? Malaysia, India a ummi hna UN card hmuh in resettlement hngak, hngak peng zei thawngpang hmanh rin lo, palik tih, mifir le damaih tih, thong tlak tih, tihnak in a khat, ram thum cuannak ah hngawng thahri dawh peng, a sau deuhmi hna zong kan um kho men. Na ruah ningin thil a kal maw? Khua lei ummi hna nan duh ning le nan herh ning in phaisa kan in kua kho hna lo? Nan ruah ning bantuk a si maw? Sianginn a kaimi hna kan zumh ngaingaimi nih phaisa an kan kua lo kan ruahningin a si maw? Kan ngaih a chia ko men lai.

Joseph nih a u le chuncaw chanh dingin a kal. Ka u le nih an ka lawmh ngai lai, an ka hmuh tikah an i nuam lai tiah a ruah ko lai. Asilo. Khawr chung tu ah an thlak. Thah ngai cu a tha lai lo tiah upa bik Judah nih a ti caah Izip ram tu ah an zuar. Joseph a ruah ningin thil a kal lo. Zumawktlak ngaiin Faro siangpahrang caah rian a ttuan. Siangparhrang nih a ka dawt tuk tiah a ruah lio ah thonginn ah a phan. A ruah ningin thil a kal lo. Israelmi hna Izip ram in kan chuak lai cawhnuk le khua hliti in a luangmi Kanan ram kan phan lai tiah an i  ruah. Asilo. Izip ram nakin a har deuhnak these ramcar chungah kum (40) an vai. An ruah ning bantuk a si maw?

Vawlei cungah kan ruah ningin thil a kal ton lomi cu kanmah ruang zongah a si kho, midang ruang zongah a si kho, pawngkam ruangah zongah a si kho, tabavuah harnak (natural disaster) ruangah zongah a si kho. Cucaah kanmah ruahning le duhningin vawlei cungah kan si kho hrimhrim lo ti cu a fiang. Mahbantuk lakah nun hi a har ngai ko. Nain kan Bible nih a phi a kan chimh. Kan ruah ningin a kal lomi thil kha a ttha lei in thlen khawhnak a um tiah.

Rom 8:28 nih a kan chim; “…Amah a dawmi hna caah… cun zeizong vialte hi a ttha lei in a serpiak ko hna...”  Joseph vanchiatnak, bawi sinak lam ah a thlen piaktu kha a si. Joseph cu Pathian  a dawmi a si. Kan tonmi thil hna a ttha lei in siternak lam lawng a um. Ton lonak ding lam a um lo. Kan tonmi, kan ruah ningin a si lomi thil a ttha lei in thlen a si khawh nakhnga:

1.     Pathian cu Joseph bantukin kan dawt kan i tlaih ve a herh ko. Kanmah duhnak kha Pathian duhnak in ukter. Kan lungthin dihlak, ruahnak dihlak pek in amah kha kan cungah nawl ngeihter khi a si ko (Deut. 6:4). Minung duhnak cu rawhralnak lam a kan phaktertu a si.

2.     Kanmah lam kha zul loin Bawipa lam kha kan zulh a herh (Sam 1:1-6). Vawlei cung zongah kan tuhmi cu kan zun ko lai. Bawipa  lo ah kan tuh ahcun theipar ttha kan zun ko lai.

3.     Kanmah seihnam siloin Bawipa seihnam i bei a herh (Mt.11:28-30). Minung kan thazang thawnnak nih harnak a tei lo. Bawipa tthawnnak lawng nih a tei.

4.     Misur nge nih amah a ruahnak in, a duhnak in thei a tlai kho lo. A ruang a simi a hram he aa peh lawngah a tlai kho (Johan 15:3-4). Misur nge cu nge thongkhat hmanh i peh len ko  hna sehlaw a ruangpi a um lo ahcun thei pakhat hmanh an tlai kho lai lo.

Mah vialte kan tuah khawh nakhnga amah Pathian sin lila ah bawmhnak hal hna u sih. Kan chungah amah kha hmunhma pe hna u sih.

Dopaw vawngtu fale, nu le pa u le nau hna nihin kan beimi seihnam hi kanmah duhnak (i uahnak, duhfahnak, zu le phaisa, hakkauhnak, tbk) a si sual ahcun hlawnh ko hna u sih. Zeithil kan tuah poah, kan tong zongah Bawipa seihnam i bei in kan hrampi asimi amah Pathian sinah daithlang lo tein i peh ko hna u sih. NA RUAH NING BANTUKIN A SI LO ZONGAH… na vanchiatnak timi na vantthatnak ah a cang ko lai. Na sungnak timi na teinak a si ko lai. Na dernak  timi kha na tthawnnak a si ko lai. Na retheihnak timi kha na tha damnak a si ko lai.

Bawipa nih kan dihlak caah thluachuah kan pek piak ko seh. Amen. Kalawm.

Dongnak thlacam: Hallelujah, Bawipa, na Thawngttha ngai khawhnak  na kan pek i na min thangtthat sih ko seh. Hi bantuk in hmailei zongah pehzulh tein kan chim , kan ngai cio khawhnak lai, fim rak kan chim law ruahnak rak kan cheuh zungzal ko sawh, Bawipa na duhnak hi kan duhnak ngan bik ah kan chiah zungzal khawhnak hnga kan thinlung chung cio ah rian rak ttuan hram ko tiah kan Bawipa Jesuh min in thla kan cam kan Pathian. Amen.