Bawipa Aabochanmi cu Zion Tlang Bantuk an Si.

ZARHTENI CAANHMANNAK

Saturday, October 27, 2012

Visit VFC at www.vawngtuforchrist.blogspot.in

Caatlaihtu                 :           Salai Za Cung Lian (Yangon, Myanmar)

Thawngṭhachimtu     :           Evan. Ṭial Uk (Thantlang, Myanmar)

Caantleihtu Biadomhnak: A  hmaisa bikah kei mah cantlaitu nih khuami nan dihlak in nan kut kan tleih hna. Hi bantukin Vawngtu tefa a si mi nih zarhkhat  voikhat,  Pathian bia i hrawmṭi khawhnak canṭha a kan petu kan Pathian a min ka thangṭhat, ramkip, hmunkip ah a um mi Vawngtu tefa dihlak cungah Pathian nih thluachuahnak in pe cio ko hna seh.

Baibal relnak le thlacamnak he kan can kan thawk hna lai;

Baibal kan rel lai:  ¹Bawipa nih aa thawh i, “Ti a halmi paoh ra tuah u, hika ah hin ti a um. Tangka zeihmanh a ngei lomi hna ra tuah u, rawl kha i cawk u law ei tuah u. Ra u law mitsur zu le cawhnuk kha i cawk hna u-a man zeihmanh pek a hau lai lo. ²Zeicahdah rawl asi ṭung lomi ah khan nan phaisa kha nan hloh? Zeicahdah nan nihlawh man vialte cu nan hman dih ṭung i rawl ṭamin nan um ṭhiamṭhiam tung Ka bia ngai u law ka chimmi kha tuah tuah u, rawl vialte lakah a thaw bik kha nan ei lai” (Isaiah. 55:1-2).

Hramthawknak caah thlacamnak ngei hna usih: A kan dawtu kan Pathian nihin ni tiang, ramkip, hmunkip kan umnak cio cungah lam na kan hruai i tuzing can tiang na kan umpi caah na min kan in thangṭhaṭ. Bawipa kan can kan thawk cang lai tuzing na thawngṭha a chimtu na fapa nunnak hmangin a ngaitu, le a reltu vialte kan caah, taksa, thinlung, thlarau kan damnak, kan i lawmnak le kan ṭhawnnak a si khawhnak hnga pumpak cio kan nunnak ah na thiangthlarau in rak kan umpi hram ko sawh. Kan nunnak le kan can dihlak na sin chanh bu in, na sinah thla kan cam kan Pathian.. A men.

Thawngṭhachimtu tuanbia tawi: Evan. Thomas Ṭial Uk (Parku pa) cu kum 12 renlo Evangelist a tuan cang mi a si. Kum 2001 in a tutiang a rianthiangah fek tein a dirpengmi Evan. Ṭial Uk cu Chinca le holh ṭhanchonak ah hla in tampi bawmhtu a si i a tutiangah a hlaphanhmi a zatein 1600 renglo a si cang. Chin mi nih a ngei ve mi Evangelist minthang Evan. Thomas Ṭial Uk cu Pathian thawngṭha aupi dingin vawlei cung khuazaram a culhnak hmun pawl cu atanglei bantuk in asi.

1.      India: Mizoram

2.      India: New Delhi (Voikhat)

3.      Singapore (Voikhat)

4.      Malaysia (Voithum)

5.      Thailand (Voihnih)

6.      Australia (Voikhat)

Evan.Thomas Ṭial Uk ton na duh ahcun hasanauk@googlemail.com ah ton khawh a si.

THAWNGṬHA CHIMNAK

BAWIPA AABOCHAN MI CU ZION TLANG BANTUK AN SI

Evan. Thomas Ṭial Uk

Salm 125 : 1 ¹“Bawipa aa bochanmi cu Zion Tlang bantuk an si; Zion Tlang, hninh khawh zong a si lo i ṭhial khawh zong a si lomi bantuk an si.”

Khuami hna,nan umnak kip ah Bawipa nih a mitfanglai in inveng cio ko hna seh. Kan hnu zerh kha Niawh Tlang ah kan um lio a si caah Pathian bia chimdingmi ka caan ka tlolh  i nan hmai kan khap hna lo rak ka ngaithiam hram uh.

Zumtu hna nun hi hneksaknak le tukforhnak karlak ah nun karhlangmi kan si caah le Thlichia le Tilet lakah anungmi kan si caah, Bawipa caah fekte le zumhawktlak tein nun kan hman aherh ko. Zumh awktlak tein nun kan duh ko buin zei ruangah dah kan tluk ṭhan i mual kan pho ṭhan lengmang tawn hnga tihi ka ruat ṭheu tawn, Bible kan rel bantukin, Bawipa aabo chanmi cu Zion Tlang bantuk an si, Zion tlang hninh khawh zong a si lo i, ṭhial khawh zong asilomi bantuk an si, Halleluijah. Minung hi kan fek kho lo, a fekmi Khrih nun ngeitu hna cu Tukforhnak Thlichia le hneksaknak Tilet nih a nun deng ko hmanh seh, an mah an fek lo, an nun fehnak cu Khrih ṭhawnnak in a si zungzal, cu caah John 6 : 7 - 8 ahcun Jesuh nih, ka kal hi nan caah aṭha kei mah ka kal lo ahcun bawmtu nan sinah a ra kho lai lo, keimah ka kal ahcun bawmtu Thlarau nan sin ah ara lai a ti, Halleluijah.

U le nau hna bawmtu thiang Thlarau hi kan teinak le kan thawnnak cu a si, bawmtu Thlarau hi kan Ram ah hmanzia kan thiam tawn lo, micheu nih cun, Lamnak le lawmhnak lawngah kan hman i kan mah ah Bawipa duhlomi teinak le sual raldohnak ah a kan pekmi Thlarau hman kan phikh tawn, cu caah  zumtu tampi nun kan tluk i zumtu mui duhnung kan ken khawhlonak asi tawn. Pathian nih a kan duhpiakmi nun cu Mupi nun hi a si, zeibantuk Thlichia a hran zongah a caah thazang a laknak le azuan ṭhawnnak tu ah a cang tawn, cun Mupi nih Sathu le saṭhing le sanam a ei bal lo, Sathu le sanam a ei mi cu Noah nih rian a fial i a kir ti lo mi a tlau mi langaak  tu a si.

U le nau hna Langaak bangin kan hmuhmi poh ei le a thu i a nam mi zong fuh, pawngkam caah kan rim chiat lai le pawngkam harsatnak petu kan si zong thei loin, Langaak bang, mah kaa thawt poh ahcun a lawmh pengmi hi zumtu nun a si lo, Zumtu cu Khrih rimhmuinak alanghtertu ding kan si, Halleluijah.

Parofet Elisha zong Elijah nih a pekmi Thlarau puanthar a ngeih i aalak hnu ahcun, a mah ngeih ṭhingmi Puan kha apam tuk a ti loh, a hlawnh bak ko! Cu caah Thlarau thluachuah let 2 a conak a si, Bawipa Thiangthlarau puanthar a co cangmi hna nihcun kan rak ngeih ṭhingmi puanhlun nunhlun  kha hlonh bak in hlonh in cu hnu lawngah kan nun ah Thluachuah let 2 ram ah nun a tingco mi kan si ve lai, Halleluijah.

Cu caah khuami hna kan umnak ram kip ah Bawipa caah zumhawktlak in kan um i Pathian sunparnak kan langhter pinah Zion tlang bantukin afekmi kan si khawhnak hnga Bawipa Thiangthlarau hriamnam kan herh ko, cu Thiang Thlarau hriamnam ngeitu hna nih vulei ah Khrih mui kan cuan khawh nakhnga Bawipa pekmi Thlarau hriamnam hi hmanzia thiam uh sih.

Bawipa nih thluachuah kan pekpiak ko seh.

A hla tiangin thazangthar hla hna uh sih: Hikha ahhin hmetpiak Titsa le Thlarau Nun

Donghnak thla kan cam lai:    A kan dawtu kan Pathian a hramthawk ah kan in hal bantuk in tuzing kan hramthawk in a dongh tiang na thawngṭha thei khawhnak le rel khawhnak can na kan pek caah na cungah kan i lawmtuk hringhran. Hi na thawngṭha hi, a ngaitu le a reltu fanu fapa hna kan dihlak kan nunnak ah lamhmuh saktu,  nunzia a kan thiamtertu le thlarau thazang a kan pe chin lengmangtu a si khawh nakhnga thluachuahnak kan pek piak ko. Atang rihmi kan can le kan nunnak dihlak na kutthiang ah chanh in na sinah lunglawm buin thla kan cam kan Pathian. A men.