Samaria Khua Nun in Zumtu Nun Cawng Ve Hna Uhsih

ZARHTENI CAANHMANNAK

Saturday, November 3, 2012

Visit VFC at www.vawngtuforchrist.blogspot.in

Caantlaitu                :           Salai Van Cung Lian (Hyderabad, India)

Thawngṭhachimtu     :           Evan. Ṭial Uk (Thantlang, Mynamar)

Baibal Relnak: ⁸ “Bawipa cu dawtnak a ngeimi le mi zangfah thiammi a si, thinhun ahar i afekmi dawtnak in a khatmi a si. ⁹Aho cung poah ah a ṭha i sermi hna an dihlak cungah zaangfahnak a ngei… ²¹Bawipa cu ka thangṭhat lai, thilnung vialte nih a min thiang cu zungzal in thangṭhat hna seh!.”(Salm 145: 8-9, 21).

Thlacamnak ngei hna usih: Asermi thil vialte le a mi hna cungah afekmi dawtnak he a khat zungzal mi kan Khuazing le Pathian, na fa le hitibantuk in na Bia i hrawmṭinak caanṭha le caansungluai na kan pek ṭhan caah na min thiang cu a zungzal in thangṭhat si ko seh. Na fapa nih na bia a phuangmi hi nangmah leikap in cohlang awktlak a si i cutincun na m, na fa hna kan caah thluachuahnak kan pepiak hrawm ko sawh tiah Khamtu Jesuh Khrih min in thla kan cam, kan Khuazing.

Thawngṭhachimtu Tuanbia tawi: Thawngṭhachimtu tuanbia tawi reldingah hika ahhin “Hmetpiak”

THAWNGṬHA CHIMNAK: U le nau, nu le pa hna, Pathian bia ah thazaang van lak ṭhan dingin kan sawm hna. Pathian Bia ah ṭhazaang le thawngnak cu a um i a Bia cu zeihmanh nih a tei kho lo i a Bia cu nunnak a si.

SAMARIA KHUA NUN IN ZUMTU NUN CAWNG VE HNA UHSIH

Evan. Ṭial Uk

Thawngṭhachimtu Bible thimmi:  ²⁴Cu hnuah cun, Siria Siangpahrang Benhadad nih a ralkap vialte cu a pumh hna i a hung kal i Samaria kha an dum. ²⁵Cun annih nih an kulh caah khan Samaria khua ah cun mangṭam fak ngaingai a tlung i laa lu pakhat nih ngun shekel sawm riat a man i ṭhuro ek kab cheu li cheu khat nih ngun shekel panga a man. (2 Siangpahrang 6 : 24 – 25).

Siria Siangpahrang Benhadad nih Samaria khuapi cu atuk i, a khua cu a kulh, Samaria khua Siangpahrang le khuami hna nih an khua himnak caah tiah Khuakulh nak Vanpang chahpi, an ser i, cu an khua himnak caah an kulh mi Hauhruang lila kha an ral hna nih an mah kulhnak ah an hman caah, aho hmanh hau leng an chuah khawh lo caah an khuachung ah mangtam a tlung i rawlṭam tuar in Minung tampi an rak thi. Nihin kan ram Khrifa Buu cheukhat zong kanmah himnak caah kan i kulh kanhnak Phungphai le Doctrine hna hi achung ummi Member hna caah Thlarau rawlṭam in hremnak caah Sehtan nih chirhchan ah ahman tawn ve.

An khua chung ah mangṭam a tlun caah Laa luruh hmanh kha Ngun Sekel 80 a si i, Thuro ek hmanh khan Sekel 5 in an cawk, Minung nih ei awk asilo mi thil hna kha mangtam tlunnak ram ah cun a man afak i Mipi nih an i cuh ko. Nihin kan khua le kan Ram ah Thlarau Biatak rawl mangṭam a tlunnak ah cun, Minung nih ei phung asilo mi le dinphung a silomi, athimi thil, Khaini, Tikor, Zuu, Kunza, Kuak, tbk, hna kha anman a fak i mipi nih cawk ding in an i cuh. Isai 55 : 2  ah cun zeiruangah dah rawl tak asilo mi ah nan phaisa cu nan hloh i nan nihlawh man vialte cu nan hloh  a ti bangin an si taktak. Cu lawng siloin, an rawl ṭam ruangah Hringtu hna zongnih an hrincia mi fadawt kha an ṭhah hna i an chumh hna i an ei, cu ruangah Nutung pa 2 hna zong an buai i,  pakhatnu nih nangmah fa kan ei hmansat lai i, ahnu ah keimah fa kan ei te lai an i ti i, athaizing ah afa athuh kanh i curuang ah an buai ai.

Nihin kan Ram cu fa le sa kha kan rawl si ti lo in fapa le Fanu le ruang ah mithli tu kan rawl ah a cangve, cu lawng siloin, fapa le Fanu hna an thisen man kha kan buaipi i, an kan kuat mi phaisa kha pakhat nih ka cawih chung law  amiak in kan cham lai ti le, kafa nih a ka kuat ve tikah kan cham te lai tiin i ti i, a donghnak ah, cham duh ti lo ruangah Zung an phan i Tazaa an i cuai hei ti thawng le te kan Ram ah athangcang, dawtnak a um kho lo remnak Tibang a reu.

Kha lio caan teah Hauhruang cungah aachawk mi Siangpahrang sinah Minu pa 2 a buai mi kha an rak phan i an piahtana an chimh tikah, Siangpahrang nih apuan a thleh i, Buuri puan kha aa aih   i, Elisha  kha mi pakhat a va thlah i ava kawlter hna. Krifabuu ah siseh, Khua le ram ah siseh hruaitu hna nih Pathian mi le fa kan fuh i kan kawl khawh nakhnga caah Bawipa nih hin harnak a phunphun le rawlṭam tihalnak hna zong hi a tlunter tawn.

Khalio caan teah, hauleng ah an ṭhawl mi hna Thinghmui pa 4 hna kha Metting an tuah ve, khua lei kan kir ahcun an kan thah lai, hi ka ah kan ṭhut ko zongah kan thi ṭhiamṭhiam lai, cu caah Siria mi hna riahnak tuah kal uh sihlaw an kan thah le kan thi ko lai ta an ti i cuticun Siria ralkap hna riahnak ah an va kal tik ah , Bawipa nih an thawngpang kha raltuknak rangleng tampi thawngah le ralkap thawngah arelter hna i, Siria mi hna nih, Isreal mi hna nih Hit mi le Izip mi hna an i rawih ko hna hi teh tiah an zam dih. Bawipa nih akan umpi i akan hruai ahcun, zeirel lo mitete thawng hi athanter i cawnnak ngei lo tete thawng hi mikip a theihter hna i, mi nih sualkip puhmi hna nun hmang in a sunparnak alanghter tawn, Halleluijah.

Thinghmui pa 4 nih cun Siria mi hna riahbuuk i an rawl pawl kha riahbuk pakhat hnu pakhat in an va lut  i an ei i an ding, cun anmah le an mah cu an i ceih i, kan thil tuahmi hi zeidah si kan mah lawng Vuai tein ei hi a si ṭung lo, nihin hi thawngṭha ni a si kanmah nih khuadei kha kan hngak ahcun kan cungah mawhphurhnak a um sual lai siangpahrang inn chungkhar kha va chim hna uh sih an ti i an tho i, khua chung ah Siangpahrang sin le khua mi sinah an va chimh hna i cuticun hau leng ah an chuah cia mi hna Thinghmui pa 4 hmangin bawipa nih rawl a pek ṭhan hna i khim tein an ei i an ding ṭhan, Halleluijah. Nihin kan Krifa buu le khua le ram mi hna nih hauleng ah kan chiah mi hna le, nun in kan pomhlawm khawh lo mi hna tu hmangin kan Thlarau caah a herhmi Ti le rawl hi a kan pek ṭheu tawn. Halleluijah

Bawipa nih thluachuah kan pekpiak ko seh.

Donghnak Thlacamnak: Kan Khuazing le kan Pathian, na fapa nih ṭhongnak rawl a kan pekmi hi, na fa le kan nunnak le kan thinlung chungah zungzal in nunter hram ko tiah, na sinah bawmnak hal in lunglawmnak he thla kan cam kan Khuazing le Pathian.

------------------------------------------------- &---------------------------------------------