Va kal Uh Law Miphun Vialte kha ka Zultu ah Va Ser Hna Uh

Va Kal Uh Law Miphun Vialte kha Ka Zultu ah Va Ser Hna Uh

Salai Tum Za Sang

¹⁸“Jesuh nih cun a hun naih hna i, ‘Vancung le vawlei cung i a um mi nawlngeihnak vialte cu pek ka si cang. ¹⁹Cucaah khuazakip ah va kal u law miphun vialte kha ka zultu ah va ser hna u. Pa le fapa le thiangthlarau min in tipilnak va pe hna u law, ²⁰kan fialmi vialte hna hi an zulhnak hnga va cawnpiak hna u. Cun hihi philh hlah u. Nan sinah a zungzal in caan dongh tiangin ka um lai’ tiah a ti hna.”(Mathai.28:18-20)

A hmasabik ah caanṭha a ka petu Pathian min ka thangṭhat, cun ṭuanvo a ngeitu hna nan cung zongah lawmnak tampi ka ngei. Nan dihlak, Pathian nih taksa thinlung damnak in pe ko hna seh. Jesuh nih a zultu kha a thawh hna i miphun vialte sin ah THAWNGṬHA va chim u a ti hna. Hihi van cungah a kai laiah a zultu hna sinah a cahtak mi hna a si. Jesuh nih a duhbik mi cu Thlarau tlau a sinah an rak kir hi a si. Mi vialte nih khamhnak hmu hna seh ti a duh zungzaltu kan Pathian a si.

Asi ahcun zultu hna cu nihin ahhin an um ti lo. Asi ahcun a hodah nihin ZULTU cu a si kun hnga? Cucu nihin zumtu nangmah le keimah kan si. Phundangin kan chim ahcun  a hrinthar mi nangmah le keimah hi kan si. Khoika in dah thawngṭha cu kan chim hmasa lai? Kan chungkhar in kan thawk hmasa lai. Cun kan khua kan ram in kan thawk ṭhan lai. Cu khawh cun Kan miphun sinah. Vawlei cung khuazakip ah a ummi  ka dawtmi khua mi hna nan chungkhar a dam maw? Phundangin nan chungkhar in khamhnak nan hmu maw? Nan co cang maw?  Kan khua kan ram tah a dam maw?

Chungkhar in thawk timi hi a har ngaimi thil a si. Nain na nupi na fa nu/pa kha na dawt hna ahcun na ken mi thawngṭha kha chimh. A cheu cu kan nupi le fa nu/pa sinah bia thlum chim lo in midang sinah chim a hmang mi kan um, cucu a silo mi thil a si. Na nupi na fa nu/pa hna caah thla na cam bal maw? An caah rawl na ulh bal maw? Na chungkhar kha Pathian dawtnak thei hna seh cun i daw usih. Kan khua kan ram hi zeitluk hmanh in taksa lei in rum u si law thlarau lei in kan dam lo ahcun kan cungah Pathian aa lawm lai lo. Thlarau lei in kan khua a dam hi a biapi taktak mi a si. Kan khua hi kei cu ka ti tawn ramdang a um mi hna kan nu le kan pa hna nihhin crusade hna hi kan tuah piak kho  hna sehlaw. Pathian mihman hna hi kan sawmpiak kho hna sehlaw tihi  ka rak ruat tawn.

Jesuh nih a kan fial mi rian hi kan ṭuan maw? Acheu nih cun kei cu thawngṭha chim zong ka thiam lo nan ti men lai nain chimnak ding lam tampi a um ko, thlacamnak in siseh, nunzia in, chawva in, peknak in, misifak bomh duhnak lungthin. Cu vialte thil tuah khawhnak cu nihin zumtu nang le kei kan cungah a um ko ti mi hi philh lo tein i nunpi kho peng usih tihi kan sawm duh hna. Cu vialte lakah a bia pi cem mi cu Jesuh nawlngeih hi a si. A nawl kan ngeih ahcun taksa  thlarau damnak kan hmu lai i kan khua kan ram zong a dam ko lai.

Hi thawngṭha a hrawm i a relmi nan dihlak cungah Pathian nih thluachuah in pe ko hna seh. Amen.

………………………..

Thawngtha Chimtu Konglam: Salai Tum Za Sang cu Pu. Za Dun (tleicia) Le Pi. Thluai Men hna i an fa a apalinak a si; thangtlang peng Vawngtu khua ah 1987 ah a chuak. Salai Tum Za Sang (sangsang85@gmail.com ) cu India ram i Senate of Serampore College/University tangah a um mi fimcawnnak hmun Indian Theological Seminary ah BD (New) a kum hnihnak a kai lio mi a si.