Khrih ah kan Lungput Ning

Khrih ah kan Lungput Ning

Salai Van Biak Hnin

Bible Caang:

³²"Pakhat le Pakhat cungah zaangfahnak lungthin le nemnak ngei u law Pathian nih Khrih thawngin an ngaihthian hna bantukin pakhat le pakhat i ngaithiam uh." Ephesian 4: 32

Efesa Cauk Vun Zoh Ta Hna Usih

Paul nih Efesa khuami hna caa a kuatmi hna chungah hin biapi bik in a ruahmi cu "Pathian tinhmi cu,
sermi thil paohpaoh zeizong vialte, van i a ummi si hna seh, vawlei i a ummi si hna seh, hmunkhat ah pumh dih i Khrih kha a lu i ser" kha si. Pathian mi Bawi Khrih chung i a ummi pumkhat an sinak langhternak caah hin hmantlak bia a phunphun a hman hna: Khrihfabu cu pum a si i a lu cu Khrih a si, a ti. Khrihfabu cu inn a si i Khrih cu a innkil lung a si, a ti; Khrihfabu cu nupi a si Khrih cu a va a si, a ti. Pathian vel Khrih cungin a langmi nih hin ruahnak sangpi a phakter i cu mit cun zeizong vialte hi a zoh i a cuanh.

Tlangtar:  Khrih ah kan Lungput Ning

Salai Van Biak Hnin

Tlangcung cawnpiaknak he ailo ngai bantuk in, nihin i kan Bible rel ningcang zong hi kan chunglei nunnak ah tampi a kan cawnpiak, khrihfa lungput timi nih a sawhduh mi cu kan umtu hoiher in hawi sin kan nunning khi a si. Efesa Dal linak hi phun thum in kan ṭhen khawh. Caang 1 in caang 8 tiang nih hin "Pathian sin kan rianṭuannak/pekchanhnak kha a sawhduh, caang 9-19 nihhin "kan hawile sin i kan nun ning, kan ziazaa kha a sawhduh. Cun caang 17-21 nihhin "kan ral hna sin i kan lungput umtu ning khi akan cawnpiak.

Zeitluk kan sualnak angan ko buah Pathian sinah kan i phuan i kan kaltak ahcun kan zumhnak thawng in thiam coter kan si. Khrih sin thiam coternak nihhin kan sual mawhchiatnak le kan lungthin vialte a thlen. Cun a bia he kan nung chung poah cu a mah he deihnak kan hmu. Pathian he nitin kan nunṭi nak nih khan midang sin biaṭhalo chimnak thil ṭhalo tuahnak vialte kha i sum khawhnak a kan pek.

Pathian dawtnak kan lungthin chungah a um hnu ahcun biaṭha lo chim kha kan i ralring.  Cun biaṭha lo kan chim tikah hin thil pathum lengmang fahnak kan pek. Pakhatnak ah: A kong kan chim mipa/nu. Pahnihnak ah: kan chimh mipa, cun kanmah a chimtu lilaa hi a si zungzal. Sihmansehlaw dawtnak lungthin nihcun midang thil ṭhalo tuah mi a hmuh piak lo.

Kan khuaruahnak ṭha lo nih midang sinah kan lungput a langhter, cun midang sinah biaṭhalo kan chim tikah, kanmah zong kha an rak kan ral khawh, cun kan theihawk a herh mi cu biachia kha kan chim mi nihhin thil ṭhalo a chuahter zungal, cucaah ahcun thil hi a ṭhalei in ruat hna usih, kan tonmi kip ah ilawm kho usih, mah nih khan Pathian he kan i pehtleihnak a fehter chin lai.

Cucaah Pathian sin le minung sin i kan dinfel ahcun zeihmanh ṭihawk a um lo. Khuahrauhnak ṭha lo; midang caa fahnak le khingrit a si mi thil hi kan hrial awk a si. Zisuh nih a kan chiahtak mi ngeihthiamnak hi kan zulh peng awk a si.

Cucaah Dawtmi Unau hna zumtu sin in a chuak mi kan bia hi midang caah thluakchuahnak phortu le thluachuah van ni tlaanter awk si. Korea pa Rev. Kim San Mon cu mirum zong a si lo nain a kaa in hin phaisa hi a ting le million in a chuak zungzal. Vawlei cung ramkip sifak hna hi a bawmh zungzal hna. Zeitluk in dah a kaa a sunlawi! Khrih ah kan nunnak dihlak in kan i bochan ahcun kan nih cu Khrih tuah cia mi va zulh sawhsawh khi si ko. Cu Khrih tuah cia mi zulhnak ding ahcun kan nunnak dihlak a mah sinah i ap a hau. Kan nunnak dihlak Khrih sin kan ṭumh hnu cun kan tuahmi ah siseh, kan chimrel mi ah siseh, zeizong vialte hi thluachuaknak phortu lawng te an si dih.

Thawngṭha aa hrawm mi kan dihlak caah Pathian nih a thar in thluahchuaknak kan pekpiak ko seh.   

………………………………………………….

Thawngṭha Chimtu Tuanbia Tawi: Thawngṭha a kan chimtu Salai Van Biak Hnin (aerosmithhnin@gmail.com) cu Chin Christian College in B.A (English) a kan dih piak i a tu hi Mennonite Brethren Centenary Bible College, Hyderabad, India ah B.D a kum (4) nak a kai lio a si. Salai Van Biak Hnin cu Saya Ceu Mang le Pi. Ni Ṭhai i an fa apalinak a si.