Pathian cu Paih Hna U Sih

                                                            Pathian cu Paih Hna U Sih

                                                                                By

Salai Van Bawi Lian

Bible Thimmi: Genesis. 32:26-28: ²⁶“Mipa nih cun, “Ka thlah, khua a dei deng cang,” a ti, Sihmanhsehlaw Jakob nih cun,, “Thluachuahnak na ka pek lo ahcun kan thlah bal lai lo,” tiah a leh. ²⁷ Mipa nih cun, “Na min ahodah a si?” tiah a hal i, “Jakob” tiah a leh. ²⁸ Mipa nih cun, “Na min cu Jakob a si ti lai lo, Pathian zong na paih, minung zong na paih hna i na tei hna; cucaah na min cu Israel a si cang lai,” a ti.

Israel miphun tuanbia kan zoh tikah, Fa upa nih roco a si. Fahniang nih roco a um bal lo nain, Jakob tu cu fa upa ro a co. Hi thil kan zoh tikah Jakob hi "midepde" a si ti hi a lang. A Pa a hlen lang siloin a U Esau zong a hlengtu pa a si. Thil pakhat a hung um ṭhan mi cu a nu nih Jakob a ṭenh mi ruangah a si, chiatserhnak vialte zong  a nu cungah tlung seh ti tiangin Jakob caah cun a ṭang. Aruang cu a nu nih Jakob lungput kha ṭha tein a theih lawng siloin, Jakob zong nih a duh mi fek tein aa tlaih caah a duh mi cu a co, ti kha kan cathiang nih fiang tein a kan cawmpiaknak kha kan hmuh khawh.

Acunglei ah cathiang kan rel mi zoh ṭhan hna u sihlaw, Jakob a lungput ning cu fiang tein hmuh khawh a si fawn. Bawipa van cungmi nih Jakob cu zan khuadei a paih tikah, Mipa ka thlah cang khua a dei cang lai tiah a ti tikah, Jakob nihcun "Thluachuah" na pek hlan lo cu kan thlah lai lo, tiah Pathian kha fek tein aa tlaih i "Thluahchuah" a pek hlan lo kha a paih peng. Bawipa Van Cungmi nih cun Jakob "Thluachuah" apek i, a min ah Israel tiah a sak.

Cucaah dawtmi khuami kan dihlak zong, ram chung, ram leng kan umnak cio in, kan khua le kan ram caah siseh, pumpak kan i timh mi le kan rianṭuannak cung cio ah Pathian tu hi fek tein i tlaih hna u sihlaw, thlah lo tein a mah kan Pathian tu kha itlaih peng u sihlaw… cuticun Bawipa nih san a tlai lomi kha a kan cawisan lai i, a hme mi kan si ko lio ah, miphun ngan ah a kan ser lai i, a lam kip in ṭhanchonak "Thluachuahnak" cu pek kan si ve lai.  Jakob timi, chungin "Israel " a thlengtu cu Pathian a si. Amah kan Pathian tu hi i bochan buin hmai ah kal zungzak ko hna u sih tiin ka biaruahnak ka donghter. Pathian nih thluachuah kan pe pek ko seh. Amen.
.......................

Thawngṭha Chimtu Kong: Nihin thawngṭha a kan chimtu Salai Van Bawi Lian cu Pu. Than Tum le Pi. Ṭial Can hna i an pa le lakah a hniangbik apahnihnak a si i a nih hi tanghra a aung hnu, 2012 kum ah Mennonite Brethren Centenary Bible College, Hyderabad, India ah Bachelor of Theology (B.Th) a dihmi a si. Salai Van Bawi Lian cu B.Th a kai lio ah The Best Student Award a hmuhmi a si pin ah Chin Baptist Association (C.B.A) ramchung Capar ṭial zuamnak ah kum 3 chung athiambik apakhatnak a hmuh mi a si. Salai Van Bawi Lian cu C.B.A ram chung CE committee chungtel a rak ṭuanmi a si pinah Van Bik Memorial Church ah Mino Secretary ṭamkhat chung a rak ṭuan.