Emmanuel

ZARHTENI CAANHMANNAK

Saturday, December 8, 2012

Visit VFC at www.vawngtuforchrist.blogspot.in

Caantlaitu                   :           Salai Van Biak Hnin (Palung), (Hyderabad, India)

Thawngṭha Chimtu     :           Sr. Veronica Sui Sung (Manila, Philippines)

___________________________________________________________________________

Caantlaitu Bible relnak : Ps 23: 1-2, "Bawipa cu tuukhal bantukin a ka vengtu a si, ka herhmi vialte kha a ka pek dih. Ramhring lakah a ka bawhter, dinh hmun ti pawngah a ka hruai."

Abiathiang kan relmi cungah Pathian nih kan zapi caah thluachuahnak kan pe piak hram ko seh. A men.

Hramthawk thlacamnak:  Kan Pathian Bawipa na fa le kan umnak cio ah, le kan tuan-kawlnak cio ah lam nan kan hruai i, na dawtnak he na kan umpi caah na cungah kan i lawm i na min kan i thangṭhat ko. Bawipa kan caan le kan nunnak na kut chungah kan i hlenh ṭhan ko, kan Bawipa Zisuh min thla kan cam kan Pathian. Amen.

Thlacam Cahnak: Hi vawlei harsatnak kaltak in kan Khuazing sinah a kan dintaktu kan nu Lai Ram nu nih akaltakmi innchungkhar le fanau rualchan vialte hna caah zeizong vialte ngeitu le thilti khotu kan Khuazing Pathian sinah thlaza campiak hna usih.

THAWNGṬHA CHIMNAK

Bawi Krih ah dawtmi u le nau hna kan umnak le phanhnak cio ah dam le lawm in kan um cio ko lai tiah thlacambu in nan kut kan tlaih hna. Christmas puai kan naih cuahmah i, “Emmanuel” ‘Kan sin i a um mi Pathian kong ruaṭi hna usih.

Isaiah 7:14 i Pathian biakamh “Emmanuel” cu Mattai 1:23 le bawhte Jesuh  chuahnak ah a thling. Pathian nih zeiruangah dah minung kan sinah umṭi aduh zungzal kan ti ahcun a kan dawttuk ruangah asi ko. Athiang Pathian kan sin i a umnak le kan minung sinak aa hrawm venak in a mah i, a nunnak le sunparnak ah a kan hrawm ve.

Jesuh chuah ni  lomhnak  kum fatin kan tuahnak thawngin kan biakmi Pathian anung peng ti zong a langhter. Ziahti ahcun, athicangmi caah chuahni lomh hrim a um bal lo. Christmas a naih cun, pawngkam ah thilridawh, nuamhnak le puai a tamchin. Kan i nuamcio ko. Naten, puai a vundih i, kan nuamhnak zong adih colh ve ahcun Bawipa pekmi nuamhnak tatak kan hmu rihlo tinak asi. Christmas ca i timhnak kan ngeih cio bantukin kan lungthin le ka nunzia in i timh ve uh sih.

Dawtnak pekawk i a ra mi Pathian cu dawtnak lungthin he lawngin kan cohlang kho te lai. Kan harcan le nuamhcan, kan zawtcan le ngandamcan, chun he zaan he a kan umpi peng ko.

Mah tluachuah hi atheihhngalh i, aa nunpi mi hna ca ahcun Pathian biakam “Emmanuel” cu kan caah asi hrim ko. Bawhte Jesuh i a kan pekmi daihnak, dawtnak le lunglomhnak cu lunglomhte cohlang usih, dong hna usih.  Nifatin kan lungthin chung i a nungpengtu “Emmanuel” Pathian si ko seh.

Donghnak thlacam :   Kan hramthawk in kan dongh tiang lam a kan hruaitu kan Pathian na cungah lunglawmnak tampi kan ngei. Hmailei ah, atu bantuk in caanṭha kan hmuhṭhan khawhnak hnga zong kan umpi law, caanṭha kan peṭhan ko tiah, atangmi kan caan le kan nunnak na kut thiang apṭhan buin thla kan cam kan Pathian. Amen.

Kan dihlak cungah anung kan Pathian nih kan ṭuan-kawlnak ah thluachuahnak he lam kan hruai hram ko seh. Amen.