Vawngtu Khrihfa Thawhkehnak

Vawngtu Khrihfa Thawhkehnak

Theihternak: Hi capar hi Pu Hrang Hnin ṭialmi Rev. Lung Tum Tuanbia cauk chung (cahmai 6-7) in caṭialtu nawlonhnak he lakmi asi.

Vawngtu Tipil Khrihfabu thawhkehnak cu 1928 kum ah hin a si. Rev. Lung Tum cu Pathian rianṭuantu a si caah Vawngtu Khrihfa thawhkehnak vun langhter hmasa kan duh. Ramuk bawi Pa Cik chan ah mirang nih ramuk bawifa sianginn kaiter dingin a rak ti tikah mirang sal can cu kan duhlo an rak ti i ngakṭahfa a simi Hram Ling cu Hakha ah sianginn an rak kaiter. Hram Ling cu mirang bawi cawnpiaknak thawngin Khrihfa a rak lut. 1935 kum ah tangli a awng i khua ah a rak tlung. Hram Ling cawnpiaknak thawngin thlaruk chungah Khrihfa a lutmi cu Lung Tum, Ram Nawn, Ral Tling hna an si. Hram Ling cu caansau nung loin a thi i Ram Nawn nih Khrihfa cu a hruai hna.

1940 kum ah Inn 8 Khrihfa an lut. Ramuk bawi Ral Kung nih Khrihfa a simi paoh cu lo tlak tikah lo peklo dingin le Lai phung in raithawinak caah an hmanmi Vok, Ar ai-ah phaisa in nan ka pek lai, a ti hna. Pu Lung Tum nih kan in pe kho lo a ti caah Ramuk bawi Ral Kung nih Pu Lung Tum cu a dinmi zu in a hmai ah a chak. Pu Lung Tum cu Khrihfa tlawmpal an rak um lioah hruaitu ah an rak hman. Cucaah ramuk bawi Ral Kung nih a rak huat tuk i a phunphun in zomhteihnak le sersatnak a tuah hleiah a unau cingla nih na Biaknak na let lo ahcun kan inn chungkhar in kan in chuah lai an rak ti. Asinain ka Biaknak in zeitik hmanah ka let kholo a rak ti hna.

Lopil an samh tikah Vawngtu ram i Khuachia a hratnakbik le cerh a umnak ah lo an pek hna. Khuachia a hrattuk tiah an rak ṭih ngaimi Aw-ang hmun khi a rak pek hna. Pathian nih a umpi hna i, Lo an tuah tikah harnak an tong lo. Atu ah cun Aw- ang cu Vawngtu ram kan facang chuahnak hmun rawlruk a si cang. Pu Ram Nawn a thih hnu ah Pu Hli To nih a hruai hna. Hi lio caan ah hin khuapite in Khrihfa an si dih cang. An sak tawnmi hla cu Khrihfa hlabu No. 428 “Tu hnuah khua yha ah” le No.110 “hramthiammi Jesuh a nai cang” hi fung hnih te lawng hi an thiam i an rak sak tawn. Pathian bia kha hla le bia in ṭhanter a herh caah Pu Hrang Cin cu Tikir khua ah hla cawn awkah an rak thlah. Cun Maung Ung zong Thau khua ah hla cawn ah an rak thlah ve.

Pu LungTum cu Siangbawi pa Rev .G. Robert Johnson le kan pa Rev. Dr. David Van Bik nih thlanglei ram mui (Mission) ceuter awkah a kal khomi nan um hnga maw an ti tikah Keimah ka kal lai a rak ti hna i thlanglei Laitlang, Mindat khua ah a rak kal. Kum saupi ram mui (Mission) rian a ṭuan hnuah 1963 kum ah Vawngtu nih Pastor an ngeih lo caah an rak lak ṭhan. Hi tiang hi Vawngtu Tipil Khrihfabu thawhkeh ning le tuanbia tawi cu a si. Hi hnu ah Tipil Khrihfabu chungin Khrihfabu dangdangah a chuakmi hna cu a tanglei hna hi an si. 1974 kum ah Pu Mang Dua cu R.C.M ah a lut. Member cu an karh chin lengmang i atu ahcun inn 20 hrawng an si cang. 1984 kum ah Pu Tei Hmung cu a hawile Innthum he A.G Khrihfabu ah an lut i atu cu 20 hrawng an si ve cang. 1981 kum ah Pu Khar Cin cu U.P.C ah a lut i atu cu inn 10 hrawng an si ve cang. 1994 kum ah Pu Hlei Khar le a hawile zong C.J.C ah an lut ve.